ऐरोलीत ट्रेलरच्या चाकाखाली येऊन मोटारसायकल चालकाचा मृत्यू

ट्रेलरच्या चाकाखाली येऊन
मोटारसायकल चालकाचा मृत्यू
नवी मुंबई, ता. १ (वार्ताहर) : ऐरोली सेक्टर-५ येथून दिवा गावाच्या दिशेने जाणाऱ्या मोटारसायकलला कंटेनरने धडक दिली. पाठीमागून भरधाव येणाऱ्या कंटेनर ट्रेलरने धडक दिल्याने झालेल्या अपघातात मोटारसायकल चालक जितेंद्र अण्णा शेवाळे (४२) ट्रेलरच्या चाकाखाली आल्याने त्याचा जागीच मृत्यू झाल्याची घटना मंगळवारी (ता. ३०) दुपारी ऐरोली मुलुंड मार्गावर घडली. या अपघातानंतर ट्रेलरचालक फरार असून, रबाळे पोलिसांनी त्याच्या विरोधात गुन्हा दाखल करून त्याचा शोध सुरू केला आहे.
शेवाळे सेक्टर-५ मधील पोलिस मित्र अपार्टमेंटमध्ये कुटुंबासह राहत होते. शेवाळे यांचा दूध आणि अंडी पोहोचविण्याचा व्यवसाय असल्याने ते मोटारसायकलवरून मंगळवारी (ता. ३०) दुपारी १ वाजण्याच्या सुमारास घरातून निघाले होते. तेन्हा पाठीमागून भरधाव येणाऱ्या कंटेनर ट्रेलरने त्यांना धडक दिली. त्यामुळे जितेंद्र शेवाळे हे खाली पडल्याने ट्रेलरच्या चाकाखाली आले. या अपघातात त्यांचा जागीच मृत्यू झाला. या अपघातानंतर ट्रेलरचालकाने त्याच ठिकाणी ट्रेलर सोडून पलायन केले. या अपघाताची माहिती मिळताच रबाळे पोलिसांनी घटनास्थळी धाव घेऊन शेवाळे यांचा मृतदेह रुग्णालयात पाठवला. ट्रेलरचालक अद्याप फरार असून, त्याच्याविरोधात गुन्हा दाखल करून ट्रेलर ताब्यात घेतला आहे. चालकाचा शोध सुरू असल्याचे पोलिस उपनिरीक्षक युनूस शेख यांनी सांगितले.