निविदा अंतिम होण्यापूर्वीच रंगरंगोटी पूर्ण

निविदा अंतिम होण्यापूर्वीच रंगरंगोटी पूर्ण
दक्ष नागरिकांची कारवाईची मागणी
सकाळ वृत्तसेवा
ठाणे, ता. १ : महापालिकेच्या घोडबंदर येथील हिरानंदानी इस्टेट परिसरातील मैदानाची भिंतीच्या रंगरंगोटीचे काम निविदा सुरु होण्याआधीच पूर्ण झाल्याचे समोर आले आहे. यामुळे पालिकेच्या प्रक्रियेवर आणि पारदर्शकतेवर प्रश्नचिन्ह निर्माण झाले आहे. याप्रकरणाची चौकशी करून संबंधित अधिकाऱ्यांवर कारवाई करण्यात यावी, अशी मागणी दक्ष नागरिक अशोक सोनावले यांनी केली आहे.
महापालिकेच्या सार्वजनिक कामांसाठी निविदा प्रक्रिया पारदर्शकपणे राबवली जाते, असा दावा प्रशासनाकडून केला जातो. मात्र, घोडबंदर येथील मैदानाच्या भिंतीचे नूतनीकरण व रंगरंगोटीचे कामाची निविदा २९ सप्टेंबर रोजी अंतिम होणार होती. परंतु, त्याआधीचया भिंतीचे काम पूर्ण झाल्याने नागरिकांकडून आश्चर्य व्यक्त करण्यात येत आहे. अंदाजे २५ लाख रुपये खर्चाच्या या कामासाठी निविदा प्रक्रिया केवळ औपचारिकता म्हणून राबवण्यात आली होती का? असा सवाल उपस्थित होत आहे. यापूर्वीही महापालिकेच्या काही प्रकल्पांबाबत मर्जीतील ठेकेदारांना लाभ देण्यासाठी अटी-शर्ती जुळवून निविदा काढल्याचे आरोप झाले होते. निविदा प्रक्रियेचे नियम धाब्यावर बसवून काम दिले जाते. यामुळे कामाच्या दर्जावरही प्रश्नचिन्ह निर्माण होते. ही गंभीर बाब असून, याची सखोल चौकशी करून दोषींवर कठोर कारवाई व्हावी, अशी मागणी देखील सोनावले यांनी केली.