डीपार गुंडाचा बँक कर्मचाऱ्यावर हल्ला

तडीपार गुंडाचा बँक कर्मचाऱ्यावर हल्ला
​अंबरनाथ, ता. ३ (वार्ताहर) ः अंबरनाथच्या कैलासनगर परिसरात गुरुवारी (ता. २) रात्री उशिरा एका तडीपार गुंडाने एका बँक कर्मचाऱ्याला मारहाण करून, पैशांसाठी त्याला धारदार शस्त्राचा धाक दाखवल्याची घटना घडली आहे.
पीडित बँक कर्मचारी बिजी बाबू (वय ३८) हे गुरुवारी रात्री ११ वाजण्याच्या सुमारास गुरुद्वारा रोडजवळ मित्राची वाट पाहत असताना, शहरातून तडीपार केलेला आरोपी निखिल जाधव त्यांच्याजवळ आला. जाधवने शिवीगाळ करत बाबू यांच्याकडे पैशांची मागणी केली. पैसे देण्यास नकार दिल्यावर संतापलेल्या आरोपीने बिजी बाबू यांना लाथा-बुक्क्यांनी मारहाण केली. त्यांचा शर्ट फाडला आणि जीवे मारण्याची धमकी देत धारदार शस्त्र बाहेर काढले.
पीडित व्यक्तीच्या ओरडण्यानंतर स्थानिक रहिवासी जमा झाले; मात्र आरोपीने त्यांनाही धमकावण्याचा प्रयत्न करत स्वतःला परिसराचा ‘भाई’ घोषित केले. या घटनेनंतर बिजी बाबू यांनी अंबरनाथ पोलिस ठाण्यात तक्रार दाखल केली असून, पोलिसांनी आरोपी निखिल जाधवविरोधात गुन्हा दाखल केला असून फरार आरोपीचा शोध सुरू आहे.