अटल सेतूवर पिकअपला वॉक्सवॅगन कारची धडक

कारच्या धडकेत पिकअपमधील खलाशाचा मृत्यू
नवी मुंबई, ता. ३ (वार्ताहर) ः मुंबईतील अटल सेतूवर गुरुवारी (ता. २) सकाळी टोलनाक्याजवळ शेलघर येथे वाहनांचा अपघात झाला, ज्यात एका खलाशाचा मृत्यू झाला तर पिकअपचालक जखमी झाला. उलवे पोलिसांनी या अपघाताला जबाबदार असलेल्या कारचालकाविरोधात गुन्हा दाखल करून पुढील कारवाई सुरू केली आहे.
सुहास शंकर जठारी (वय ४२) त्यांचे सहकारी आणि मासे घेऊन मुरूडकडे परतत असताना, त्यांच्या पिकअप गाडीला पाठीमागून भरधाव वेगाने आलेल्या एका कारने धडक दिली. या धडकेमुळे पिकअपमध्ये पाठीमागे बसलेले सुहास जठारी हे गाडीतून खाली पडून त्यांच्या डोक्याला गंभीर दुखापत झाली. अटल सेतूवरील कर्मचाऱ्यांनी अपघातानंतर तातडीने मदतकार्य केले. उपचारासाठी त्यांना एमजीएम रुग्णालयामध्ये दाखल करण्यापूर्वीच डॉक्टरांनी त्यांना मृत घोषित केले. पिकअपचालक अभिषेक शरद जावळेकर हेदेखील जखमी झाले आहेत.