१४ गावांवरून भाजपमधील मतभेद चव्हाट्यावर

१४ गावांवरून भाजपमधील मतभेद चव्हाट्यावर
गणेश नाईकांविरोधात मंदा म्हात्रे, वादात म्हस्केंची उडी
सकाळ वृत्तसेवा
नवी मुंबई, ता. ३ : नवी मुंबई महानगरपालिकेत नव्याने समाविष्ट झालेल्या १४ गावांवरून भाजपमधील मतभेद आता चव्हाट्यावर आले आहेत. वनमंत्री गणेश नाईक यांनी या गावांच्या समावेशाला तीव्र विरोध दर्शवला आहे, तर बेलापूरच्या आमदार मंदा म्हात्रे यांनी या निर्णयाचे जाहीर समर्थन केले आहे.
उपमुख्यमंत्र्यांनी घेतलेला हा निर्णय आपल्याला मान्य नाही, असे नाईकांनी स्पष्ट केले आहे. त्यांनी सार्वजनिक कार्यक्रमात या गावांच्या समावेशाला अखेरपर्यंत विरोध करण्याची भूमिका घेतली आहे, तसेच या ‘नालायकांमुळे’ सत्ता गेली तरी चालेल, असे वादग्रस्त वक्तव्यही त्यांनी केल्याचे वृत्त आहे, तर आमदार मंदा म्हात्रे यांनी नाईकांच्या भूमिकेला विरोध करत, ‘‘या १४ गावांनाही प्रगतीचा अधिकार आहे,’’ असे म्हटले आणि या समावेशाला आपला जाहीर पाठिंबा व्यक्त केला. महापालिका निवडणुकीच्या तोंडावर भाजपच्या या दोन बड्या नेत्यांमध्ये थेट विरोधाभास उघड झाल्याने पक्षातील अंतर्गत वाद चव्हाट्यावर आला आहे.

कोण नालायक आणि कोण लायक हे जाहीर करा
वनमंत्री गणेश नाईक यांनी केलेल्या टिकेला शिवसेनेचे ठाण्याचे खासदार नरेश म्हस्के यांनी प्रत्युत्तर दिले आहे. सत्ता गेली तर या नालायकांमुळे जाईल, असे नाईकांनी वक्तव्य करण्यापेक्षा नक्की कोण लायक आणि कोण नालायक हे नाव घेऊन स्पष्ट करावे, असे आव्हान म्हस्के यांनी प्रसिद्धी माध्यमांसोबत बोलताना केले.