वाहतूक नियमांविषयी तलासरीमध्ये जागरुकता मोहीम

तलासरी, ता. ४ (बातमीदार) ः तलासरी पोलिस निरीक्षक अजय गोरड यांच्या मार्गदर्शनाखाली व सहाय्यक पोलिस निरीक्षक सुरेश साळुंके यांच्या आदेशानुसार पालघर वाहतूक शाखेतर्फे तलासरी पोलिस ठाणे हद्दीत विविध ठिकाणी वाहतूक नियमांविषयी जनजागृती करण्यात आली. वडवली, आरटीओ रबर बोर्ड, इभाड पाडा ब्रिज व काजळी परिसरातील धोकादायक ठिकाणी वाहनचालकांना रस्ता पार करताना इंडिकेटरचा वापर करणे, वाहनांचा वेग मर्यादेत ठेवणे, तसेच रस्त्यावर वाहने उभी न करणे यांसह अन्य महत्त्वाच्या वाहतुकीच्या नियमांची माहिती देण्यात आली. या मोहिमेदरम्यान नियम मोडणाऱ्या चालकांवर वाहतूक शाखेचे अंमलदार बाबासाहेब जगताप आणि मनोज महाले यांनी दंडात्मक कारवाई केली. वाहतूक नियमांचे पालन करून अपघात टाळण्याचे आवाहन चालकांना करण्यात आले.