कळव्यात ११२ रहिवाशांची ४४ कोटींची फसवणूक

पुनर्विकासात ११२ रहिवाशांची ४४ कोटींची फसवणूक
पाच जणांविरोधात गुन्हा दाखल
सकाळ वृत्तसेवा
ठाणे, ता. ४ ः कळवा येथील तीन इमारतींमधील ११२ रहिवाशांची सुमारे ४४ कोटी रुपयांची फसवणूक झाल्याचा धक्कादायक प्रकार पुनर्विकासाची प्रक्रिया सुरू करताना उघडकीस आला आहे. याप्रकरणी मे. अमृत बिल्डर्स या भागीदारी संस्थेचे पाच भागीदार दीपक रमेश मेहता, जयश्री रमेश मेहता, रमेश अमृतलाल मेहता, केतन रमेश मेहता आणि प्रिती रमेश मेहता यांच्याविरोधात गुन्हा दाखल केला आहे.
मे. अमृत बिल्डर्स या भागीदारी संस्थेच्या पाच भागीदारांनी १९८९ साली शासनाच्या ४,३०० चौ.मी. भूखंडावर अमृत पार्क, श्री अमृत पार्क आणि ओम अमृत पार्क या तीन अनधिकृत इमारती बांधल्या. त्यांनी या भूखंडाची बनावट कागदपत्रे तयार करून ११२ सदनिकांची विक्री केली, असा आरोप आहे. इमारती जुन्या झाल्यावर रहिवाशांनी पुनर्विकासासाठी जमीन नावावर करण्याची प्रक्रिया सुरू केली. त्या वेळी केलेल्या मोजणीत ३६ वर्षांनंतर ही जमीन सरकारची असल्याचे समोर आले.
याप्रकरणी रहिवासी अरविंद शिवराज पटवर्धन यांनी तक्रार दाखल केली. तसेच या ४४ कोटींच्या फसवणूक प्रकरणाचा तपास आता आर्थिक गुन्हे शाखेकडे वर्ग करण्यात आला आहे.