कल्याणच्या गांधारी परिसरातील सोसायटीत शिरला नाग

कल्याणच्या गांधारी परिसरातील सोसायटीत नाग
कल्याण, ता. ५ (बातमीदार) : गांधारी येथील कृष्णालया सोसायटी परिसरात रविवारी (ता. ५) सकाळी भल्यामोठ्या कोब्रा नागाचे दर्शन झाल्याने एकच खळबळ उडाली. नागरिकांनी तत्काळ सर्पमित्रांना कळविल्यानंतर नागाची यशस्वी सुटका करण्यात आली. या बचाव मोहिमेत सर्पमित्र सतीश बोबडे आणि प्रमोद महाजन यांनी कौशल्यपूर्ण कामगिरी करत कोब्रा नागाला सुरक्षितरित्या पकडून जंगल क्षेत्रात सोडले.
नाग आढळल्याची माहिती स्थानिक रहिवासी प्रमोद महाजन यांनी दिली होती. नागरिकांनी अशा घटनांमध्ये सापाला न डिवचता, न हानी पोहोचवता सर्पमित्र, वनविभाग अथवा अग्निशमन दलाशी संपर्क साधावा, असे आवाहन सर्पमित्रांनी सोसायटीतील उपस्थित नागरिकांना केले. तसेच गवताळ, पाणथळ भागातून पायी चालताना विशेष काळजी घ्यावी, रात्रीच्या सुमारास पायाखाली पाहून चालावे, असेही आवाहन यावेळी करण्यात आले.