मो.ह. विद्यालय व रमेश परमार कनिष्ठ महाविद्यालयाचा सुवर्ण महोत्सव थाटात साजरा..

मो. ह. विद्यालय व रमेश परमार महाविद्यालयाचा सुवर्ण महोत्सव साजरा
ठाणे (बातमीदार) : जनरल एज्युकेशन इन्स्टिट्यूटच्या मो. ह. विद्यालय व रमेश परमार कनिष्ठ महाविद्यालयाच्या सुवर्ण महोत्सवी वर्षानिमित्त विविध उपक्रम, भव्य रॅली आणि संस्मरणीय कार्यक्रमांचे आयोजन करण्यात आले. यावेळी रॅली काढण्यात आली असून यामध्ये विद्यार्थ्यांसह शिक्षकवृंद, संचालक मंडळ, शालेय समिती सदस्य, पालक आणि संस्थेचे कार्याध्यक्ष शैलेंद्र साळवी, प्राचार्य विकास पाटील, उपप्राचार्या अनुराधा कुलकर्णी, उपमुख्याध्यापक सतीश घोलप, प्राथमिक विभाग प्रमुख सुनील पाटील आदी मान्यवर सहभागी झाले.
या कार्यक्रमाचे उद्‍घाटन वनमंत्री गणेश नाईक यांच्या हस्ते झाले. खगोल विज्ञान प्रयोगशाळेचे उद्‍घाटन आणि राज्यस्तरीय बोलीभाषा कवी संमेलनही यावेळी पार पडले. दरम्यान प्रमुख पाहुणे म्हणून कोकण पदवीधर आमदार ॲड. निरंजन डावखरे उपस्थित होते. प्राचार्य पाटील यांनी महाविद्यालयातील डिजिटल लायब्ररी स्थापनेसाठी एक कोटी रुपयांची गरज व्यक्त केली असता, तत्काळ प्रतिसाद देत नाईक यांनी ५० लाख आणि डावखरे यांनी २० लाख रुपयांची मदत जाहीर केली. संस्थेचे कार्याध्यक्ष शैलेंद्र साळवी यांनी याबद्दल आभार मानले.