म्हाडाच्या सानपाड्यातील दोन घरांसाठी ६१५६ अर्ज

म्हाडाच्या सानपाड्यातील दोन घरांसाठी तब्बल ६,१५६ अर्ज

सकाळ वृत्तसेवा
मुंबई, ता. ५ : म्हाडाच्या कोकण मंडळाने ५,३५४ घरांच्या विक्रीसाठी जाहीर केलेल्या लाॅटरीसाठी आलेल्या अर्जांची प्रारूप यादी जाहीर केली आहे. त्यामध्ये नवी मुंबईतील सानपाडा येथील अवघ्या दोन घरांसाठी तब्बल ६,१५६ अर्ज आल्याचे समोर आले आहे. त्यामुळे या दोन घरांसाठी कोण नशीबवान ठरणार याकडे सर्वांचे लक्ष लागले आहे. कोकण मंडळाच्या सोडतीमधील २० टक्के योजनेतील नवी मुंबईतील घरांवर अर्जदाराच्या अक्षरश: उड्या पडल्या आहेत. सानपाडा डीपीव्हीजी व्हेंचर्स येथील अत्यल्प उत्पन्न गटातील दोन घरे आहेत, त्यासाठी ६,१५६ अर्ज आले असून, अल्प उत्पन्न गटाच्या १७ घरांसाठी १८ हजार २२७ अर्ज अनामत रकमेसह आले आहेत. अत्यल्प उत्पन्न गटाचे घर २९ चौरस मीटर क्षेत्रफळाचे असून, या घरांची किमत १४ लाख ४२ हजार रुपये आहे, तर अल्प उत्पन्न गटाचे घर ३७ ते ४९ चौरस मीटर क्षेत्रफळाचे असून, या घरांची किमत १८ ते २४ लाख रुपयांदरम्यान आहेत. घरांची संख्या कमी आणि अर्ज मोठ्या प्रमाणात असल्याने मोठी स्पर्धा रंगणार आहे. दरम्यान, कोकण मंडळाच्या सोडतीसाठी एकूण एक लाख ८४ हजार ९९४ अर्ज प्राप्त झाले असून, त्यापैकी एक लाख ५८ हजार ४२४ अर्जदारांनी अनामत रक्कम भरली आहे.