साहित्य मंडळाकडून अभिजात भाषा दिनानिमित्त कार्यक्रम उत्साहात

मराठी भाषेच्या जतनासाठी सर्वांनी पुढे यावे
पालघर, ता.६ () ः पालघर तालुका मराठी साहित्य मंडळ आणि कोमसाप पालघर शाखा यांच्या संयुक्त विद्यमाने केळवे येथील सेवानिवृत्त ज्येष्ठ नागरिक संघाच्या कार्यालयात अभिजात मराठी भाषा दिवस साजरा करण्यात आला. कार्यक्रमाला डाॅ. अंजली मस्करेन्हस यांची प्रमुख उपस्थिती होती. डाॅ. मस्करेन्हस यांनी मराठी भाषेचे अस्तित्व, महत्व, बोधप्रद, वैशिष्ट्य याबाबत ओघावत्या शैलीत महत्व पटवून दिले. मराठी भाषा ही पूर्वापार चालत आलेली भाषा आहे. तिचे जतन आणि संवर्धन करणे आपली जबाबदारी असल्याचे त्यांनी येथे अधोरेखित केले. कार्यक्रमाच्या पहिल्या सत्रामध्ये साहित्य मंडळाच्या कथा स्पर्धेचा आढावा आणि चर्चासत्र मुंबई उपाध्यक्ष उमेश कवळे यांनी घेतले.
दुस-या सत्रात जवळपास २० जणांनी स्वरचित कविता, कथा, प्रसिद्ध साहित्यिकांच्या कविता, पुस्तकातील उतारे, लेखांच्या अभिवाचनाचे सादरीकरण केले. अम्रिता सावे, संजय पाटील मायखोपकर यांनी जोडिदार कथासंग्रहातील आजच्या घडामोडीवर आधारित घात कथेचे अभिवाचन केले. स्वेजल म्हात्रे, शाहीर गंगाराम घरत, नामदेव कवळे, हरिश्चंद्र पाटील, प्रिती चौधरी, वैशाली ठाकूर, भावना पाटील, विभाकर पाटील,, कुंदा ठाकूर, अशोक वर्तक, वनिता पाटील, डाॅ.भूपेंद्र संखे, उज्वला वैद्य, दिनकर म्हात्रे, उमेश कवळे आदिंनी यामध्ये भाग घेतला. संध्या सोंडे यानी कार्यक्रमाचे सूत्रसंचालन आणि आभार प्रदर्शन केले.