सूक्ष्म अन्नप्रक्रिया योजनेतून शेतकऱ्यांची वाटचाल

शेतकऱ्यांची सूक्ष्म अन्न प्रक्रिया योजनेतून वाटचाल
वाणगाव, ता. ८ (बातमीदार) : आपल्याकडे उत्पादित होणाऱ्या पिकाचे चांगल्या प्रतीचे प्रक्रियायुक्त अन्न पदार्थ बनवून आकर्षक पॅकिंगमध्ये बाजारात आणावे. यात प्रमुख्याने चिकू, भात, नागली यांचे पौष्टिक प्रक्रियायुक्त पदार्थ बनवावे आणि जास्तीत जास्त शेतकऱ्यांनी प्रधानमंत्री सूक्ष्म अन्न प्रक्रिया योजनेत सहभागी व्हावे, असे प्रतिपादन तालुका कृषी अधिकारी कार्यालय विधान येथे प्रधानमंत्री सूक्ष्म अन्न प्रक्रिया योजनेअंतर्गत आयोजित प्रशिक्षण व कार्यशाळा आयोजित करण्यात आली होती. त्या वेळी डहाणूचे कृषी अधिकारी जगदीश पाटील यांनी उपस्थित शेतकऱ्यांना आवाहन केले आहे. मंगळवारी (ता. ९ सप्टेंबर) तालुका कृषी अधिकारी कार्यालय डहाणू येथे प्रधानमंत्री सूक्ष्म अन्न प्रक्रिया योजनेअंतर्गत प्रशिक्षण व कार्यशाळा पार पडली. या कार्यक्रमास प्रमुख मार्गदर्शक कृषी विज्ञान केंद्र कोसबाड येथील गृहविज्ञान शास्त्रज्ञ रूपाली देशमुख, स्टेट बँक ऑफ इंडिया डहाणूचे व्यवस्थापक सूरज गणवीर, कृषी अधिकारी अजय हुले, डहाणू तालुक्यातील जिल्हा संसाधन व्यक्ती मिताली पटेल, सुयोग मुकणे आणि शेतकरी बांधव मोठ्या संख्येने उपस्थित होते.
कार्यक्रमाच्या सुरुवातीस प्रभारी मंडळ कृषी अधिकारी वाणगाव सचिन तोरवे यांनी प्रधानमंत्री सौक्षम अन्न प्रक्रिया योजनेबाबत सविस्तर माहिती देऊन योजनेची संकल्पना व कार्यपद्धती उपस्थितांना समजावून सांगितली. प्रधानमंत्री सूक्ष्म अन्न प्रक्रिया उद्योग योजनेअंतर्गत लाभ घेण्यासाठी १८ वर्षे पूर्ण असणे आवश्यक असून, कोणत्याही प्रकारच्या प्रक्रिया करून पॅकिंग करून विक्री करता येणाऱ्या खाद्य पदार्थाच्या व्यवसाय उभारणी साठी ३५ टक्के अनुदान १० टक्के स्वहिस्सा आणि ५५ टक्के बॅंक कर्ज अशा पद्धतीने ही योजना राबवता येते. एकूण प्रकल्पाच्या ३५ टक्के कमाल १० लाख रुपयापर्यंत अनुदान या योजनेत देता येते. ही योजना बॅंक कर्जाशी निगडित असून बॅंक कर्ज घेणे अनिवार्य आहे. योजनेअंतर्गत पोहा मिल, मसाले पदार्थ, विविध फळांवर प्रकिया करून जाम जेली करणे, चिकू चिप्स, पावडर, लोणचे, पापड, दुग्धजन्य पदार्थ पनीर, मिठाई, तेल घाना, बेकरी पदार्थ, मत्स्यप्रकिया पदार्थ अशा विविध पदार्थांच्या व्यवसायासाठी अनुदान देता येते.