भिवंडीत झुडपात आढळले जिवंत पुरुष जातीचे अर्भक

झुडपात आढळले अर्भक
भिवंडी, ता. ८ (वार्ताहर) ः भिवंडी शहरात एक धक्कादायक घटना उघडकीस आली आहे. टेमघर पाइपलाइनजवळील लक्ष्मीनगर परिसरातील झाडीझुडपात सोमवारी (ता. ६) रात्रीच्या सुमारास पुरुष जातीचे एक दिवसाचे जिवंत अर्भक पिशवीत गुंडाळून फेकून दिल्याचे आढळले. हे अर्भक दिसताच परिसरात मोठी खळबळ उडाली. या घटनेची माहिती मिळताच भिवंडी शहर पोलिसांनी तातडीने घटनास्थळी धाव घेतली आणि त्या अर्भकाला स्व. इंदिरा गांधी स्मृती उपजिल्हा रुग्णालयात दाखल केले. सध्या हे बाळ सुदृढ असून, त्याचे वजन २.२५० किलो असल्याचे डॉक्टरांनी सांगितले आहे. पोलिसांनी हे घृणास्पद कृत्य करणाऱ्या अज्ञात व्यक्तीचा शोध सुरू केला आहे. यासाठी परिसरातील सीसीटीव्ही फुटेजच्या माध्यमातून तपासणी केली जात आहे.