स्थानिक तरुण उद्योजकांच्या सहभागाने मेळावा रंगला

स्थानिक तरुण उद्योजकांच्या सहभागाने मेळावा रंगला
विरार, ता. १२ (बातमीदार) ः गेली ३१ वर्षे सोमवंशी क्षत्रिय समाज महामंडळ सर्व समाजातील तरुण उद्योजकांना प्रोत्साहन देण्यासाठी वसई ट्रेड फेअरचे आयोजन करीत आहे. यावर्षीचा वसई ट्रेड फेअर २०२५ रविवारी (ता. ५) समाजमंदिर येथे पार पडला. या सोहळ्याचे उद्घाटन नितीन म्हात्रे, सीईओ, डी फॅक्टरी को-वर्किंग स्पेस तथा चेअरमन समाजमंदिर ट्रस्ट यांच्या हस्ते झाले. या वेळी नरेंद्र राऊत, जगदीश राऊत, सुरेश चौधरी, मिलिंद म्हात्रे, अरविंद म्हात्रे, संतोष वळवळीकर, रोहन घोन्सालवीस, सुभाष चौधरी, केवल वर्तक, संदेश वर्तक, पंकज वर्तक, चित्तरंजन म्हात्रे आदी मान्यवर उपस्थित होते.
आपल्या छोटेखानी भाषणात नितीन म्हात्रे यांनी उद्योजकांचे प्रेरणास्थान स्व. रघुवीर पाटील यांच्या कार्याचा उल्लेख करून त्यांना श्रद्धांजली वाहिली. ते म्हणाले, ‘‘स्व. पाटील यांनी वसई ट्रेड फेअरची सुरुवात केली आणि आज अनेक सहभागी उद्योगजगतामध्ये वेगळी ओळख निर्माण करून यशाच्या शिखरावर पोहोचले आहेत. माझ्या स्वतःच्या उद्योगप्रवासातदेखील महामंडळाचा मोठा वाटा आहे. मला उद्घाटक म्हणून आमंत्रित केल्याबद्दल मी मनःपूर्वक आभार मानतो.’’ या सोहळ्यास महामंडळाचे पदाधिकारी, स्टॉलधारक व मोठ्या संख्येने उद्योजक उपस्थित होते. भविष्यात वसई विकास बँक, वसई जनता बँक, कॅथॉलिक बँक तसेच वसईतील इतर सहकारी संस्था यांच्या संयुक्त सहभागातून आणखी भव्य ट्रेड फेअर आयोजित करावा, अशी सूचना नितीन म्हात्रे यांनी या वेळी केली.