राजकीय दिग्गजांचे स्वप्न भंग

वज्रेश्वरी, ता. १५ (बातमीदार) : ठाणे जिल्हा परिषद आणि त्याअंतर्गत येणाऱ्या भिवंडी पंचायत समित्यांच्या आरक्षणाची सोडत सोमवारी (ता. १३) जाहीर करण्यात आली. या सोडतीमुळे काही महिन्यांपासून मोर्चेबांधणी करणाऱ्या अनेक राजकीय दिग्गजांचे स्वप्न भंगले आहे. तर काहींच्या महत्त्वाकांक्षेला धक्का बसला आहे. ही निवडणूक ‘मिनी विधानसभा’ म्हणून पाहिली जाते. त्यामुळे इच्छुकांमध्ये जोरदार चढाओढ सुरू होती.
गणेशपुरी गट आणि आसपासच्या गटांत शिवसेना, भाजप आणि राष्ट्रवादी काँग्रेसचे अनेक दिग्गज इच्छुक असल्याची चर्चा होती. मात्र, आरक्षण जाहीर झाल्यानंतर त्यांच्यावर आकांक्षांचे पाणी फिरले. भिवंडी तालुक्यातील जिल्हा परिषद गटांमधून अंबाडी, महापोली, लोणाड, खोणी, खारबाव, कारिवली, राहनाळ, काल्हेर, अंजूर, रांजणोली आणि कोन अशा गटांमध्ये जातीनिहाय आरक्षणाची व्यवस्था करण्यात आली आहे. यामध्ये काही गट अनुसूचित जाती, अनुसूचित जाती महिला, मागास प्रवर्ग महिला यांच्यासाठी राखीव ठेवण्यात आले आहेत. यामुळे निवडणूक लढविण्यासाठी घोड्यावर बसलेले अनेक दिग्गज इच्छुक विसरले गेले. गणेशपुरी गटासाठी अविनाश राऊत, अमोल पाटील, नरेश ठाकरे, सुभाष पाटील, विनोद पाटील, अनंता शेलार हे इच्छुक असल्याची चर्चा होती; मात्र गणेशपुरी गटात अनुसूचित जमाती महिलांसाठी आरक्षण पडल्यामुळे या निवडणुकीसाठी तयार असलेले काही इच्छुकांचा भ्रमनिरास झाला आहे.