महिलांचा सन्मान ही शिवसेनेची परंपरा : मोहन उगले

घरेलू कामगार महिलांना साडीवाटप
कल्याण, ता. १९ (वार्ताहर) : छत्रपती शिवाजी महाराजांनी साडी-चोळी देऊन येथील सुभेदाराच्या सुनेचा सन्मान केल्याचा इतिहास कल्याण नगरीला आहे. हाच आदर्श डोळ्यासमोर ठेवून शिवसेनेची प्रत्येक महिलेचा सन्मान करण्याची परंपरा आहे, असे मत शिवसेना उपशहरप्रमुख तथा माजी नगरसेवक मोहन उगले यांनी व्यक्त केले. प्रभाग क्रमांक २८, काळा तलाव परिसरातील गणेश नगर, नवनाथकृपा चाळ, खंडेलवाल कॉलनी, सुर्वे चाळ, ढगे कॉलनी आणि रामनगर या भागांमध्ये शिवसेना ठाणकर पाडा विभागीय शाखेतर्फे मोहन उगले यांच्या माध्यमातून घरेलू कामगार महिलांना दिवाळीनिमित्त फराळ आणि साडीवाटप करण्यात आले. त्या वेळी ते बोलत होते.
शिवसेना महिला कल्याण शहर संघटक नेत्रा उगले, विभागप्रमुख अनंत पगार, उपविभागप्रमुख दिगंबर ठाणगे, शाखा संघटक ज्योती पाटील यांच्या उपस्थितीत परिसरातील घरेलू कामगार महिलांना फराळ आणि साडीवाटप करण्यात आले. या वेळी उगले यांनी शिवसेना नेहमी सर्वसामान्य नागरिकांच्या सोबत असल्याची ग्वाही दिली. कोणतीही समस्या असली तरी शिवसेना शाखेत त्या समस्येचे निराकरण केले जाते, असे त्यांनी सांगितले. या कार्यक्रमाला शिवसेना पदाधिकारी, शिवसैनिक, युवासैनिक, महिला आघाडी तसेच परिसरातील नागरिक मोठ्या संख्येने उपस्थित होते.