झेंडू १०० रुपये किलो

झेंडू १०० रुपये किलो
नवीन पनवेल, ता. २१ (बातमीदार) ः लक्ष्मीपूजनासह दिवाळी पाडव्यासाठी झेंडूच्या फुलांना अधिक मागणी असते. त्यामुळेच पनवेलमध्ये झेंडू १०० रुपये किलोच्या भावाने विकला जात आहे.
दसऱ्याला प्रचंड भाव आलेल्या झेंडूला लक्ष्मी पूजनानिमित्त ८० ते १०० रुपये किलोचा भाव मिळाला. दिवाळी सणासाठी लक्ष्मीपूजन, पाडव्यासाठी झेंडूच्या फुलांचे हार, तोरण, तसेच पूजेसाठी फुलांची आवश्यकता भासते. यावर्षी शेतकऱ्यांनी झेंडूची फारशी लागवडच केली नव्हती. त्यामुळे दसऱ्याच्या दिवशी झेंडूच्या फुलांना हजार रुपये क्रेटपर्यंत भाव पोहोचले होते. पावसाचा फुलांना फटका बसल्याने झेंडूची आवक कमी होणार, अशी भीती वर्तवली जात होती; मात्र फुलांची आवक चांगली झाली असल्याचे फूलविक्रेते परेश वाघे यांनी सांगितले.