फटाक्यांच्या विक्रीवरून दोन गटांमध्ये राडा

फटाक्यांच्या विक्रीतून दोन गटांत तुफान राडा
पोलिसांसमोरच दगडफेक; परिसरात तणाव
टिटवाळा, ता. २३ (वार्ताहर) : दिवाळीच्या पार्श्वभूमीवर मोहने परिसरात फटाक्यांच्या विक्रीवरून दोन गटांमध्ये झालेल्या वादाने सोमवारी रात्री मोठे आणि हिंसक स्वरूप धारण केले. लहुजीनगर आणि मोहने गाव येथील युवक या राड्यात आमने-सामने आले. फटाक्यांच्या देवाणघेवाणीतून सुरू झालेल्या किरकोळ वादाचे रूपांतर अल्पावधीतच मोठ्या हाणामारी आणि दगडफेकीत झाले. दोन्ही गटांकडून तुफान दगडफेक करण्यात आली, ज्यात मोहने गावातील अनेक युवक जखमी झाल्याची प्राथमिक माहिती आहे.

घटनेची माहिती मिळताच पोलिसांनी तत्काळ धाव घेतली आणि दोन्ही गटांतील काही युवकांना ताब्यात घेतले, मात्र पोलिसांच्या उपस्थितीतही युवकांनी दगडफेक सुरूच ठेवली. या अचानक झालेल्या हिंसक प्रकारामुळे परिसरात तणावाचे व भीतीचे वातावरण निर्माण झाले असून, सुरक्षेसाठी मोठ्या संख्येने पोलिस दल तैनात करण्यात आले आहे. हाणामारीत मोहने येथील कृष्णा प्रकाश पवार आणि अविनाश प्रकाश पवार तसेच लहुजी नगर येथील संध्या साठे हे जखमी झाले आहेत. खडकपाडा पोलिसांनी दोन्ही गटांतील प्रमुखांना ताब्यात घेऊन चौकशी सुरू केली आहे.

अवैध धंद्यांवर कारवाईची मागणी
स्थानिक नागरिकांनी या घटनेच्या पार्श्वभूमीवर तीव्र संताप व्यक्त केला आहे. मोहने परिसरात गांजा विक्री, जुगार अड्डे, मटका आणि हातभट्टीची दारूविक्री यांसारखे अवैध धंदे खुलेआम सुरू आहेत. या धंद्यांमुळे नशेखोर तरुणांचे प्रमाण वाढले असून, त्याचा फायदा या दंगलीत घेतल्याचा आरोप नागरिकांनी केला आहे. पोलिसांनी वेळीच अवैध धंद्यांवर ठोस कारवाई केली असती, तर आज हा प्रकार घडला नसता, असे नागरिक बोलत आहेत. खडकपाडा पोलिसांनी तत्काळ अवैध धंद्यांवर कारवाई करावी आणि दोन्ही गटातील गुन्हेगारी पार्श्वभूमी असलेल्या दोषींना अटक करावी, अशी मागणी नागरिकांकडून जोर धरू लागली आहे.