दिवाळी पाडव्याच्या मुहूर्तावर दुचाकीखरेदी

कासा, ता. २५ (बातमीदार) ः डहाणू तालुक्यातील डहाणू, कासा, आशागड आणि वरोती परिसरात दिवाळी पाडव्याच्या मुहूर्तावर दुचाकी खरेदीचा उत्साह उसळला. गेल्या दोन दिवसांत वाहन विक्री केंद्रांवर ग्राहकांची मोठी गर्दी पाहायला मिळाली. सकाळपासूनच ग्राहकांनी शोरूमकडे धाव घेतली असून शुभ दिवशी नवीन वाहन घेण्यासाठी स्पर्धाच लागल्याचे चित्र दिसले.

गेल्या काही दिवसांत झालेल्या मुसळधार पावसामुळे शेतकऱ्यांचे आणि सर्वसामान्यांचे मोठे नुकसान झाले होते. त्यामुळे यंदा वाहन खरेदी मंदावेल, अशी अपेक्षा होती; मात्र वास्तव त्याच्या विरुद्ध दिसले. वाहन विक्रेत्यांनी सुलभ कर्ज सुविधा उपलब्ध करून दिल्याने तरुण वर्गामध्ये दुचाकी खरेदीची लाट आली आहे. अगदी कमी रक्कम भरून मासिक हप्त्यावर वाहन घेण्याची संधी मिळाल्यामुळे युवक मोठ्या संख्येने शोरूमकडे आकर्षित झाले. परिणामी, काही दुकानांमधून दिवसभरात १०० ते १५० वाहनांची विक्री झाल्याची माहिती मिळाली. डहाणू-तलासरी परिसरात बडोदा द्रुतगती मार्ग आणि बुलेट ट्रेनसारख्या प्रकल्पांमुळे अनेक शेतकऱ्यांना सरकारकडून मोबदला मिळाला आहे. त्यामुळे आर्थिक पाठबळ मिळालेल्या नागरिकांमध्ये वाहन खरेदीची लाट दिसून येत आहे.