अभिनेते सतीश शाह काळाच्या पडद्याआड

अभिनेते सतीश शाह काळाच्या पडद्याआड

मुंबई, ता. २५ ः हिंदी चित्रपट आणि मालिकाविश्वातील ज्येष्ठ अभिनेते सतीश शाह (वय ७४) यांचे आज दुपारी मुंबईत निधन झाले. गेल्या काही दिवसांपासून ते मूत्रपिंडाशी संबंधित आजारांनी त्रस्त होते. नुकतीच त्यांची प्रत्यारोपण शस्त्रक्रिया झाली होती; मात्र प्रकृतीत सुधारणा न झाल्याने त्यांनी पी. डी. हिंदुजा रुग्णालयात दुपारी अडीच वाजण्याच्या सुमारास अखेरचा श्वास घेतला. त्यांच्या पश्चात पत्नी मधू शाह आहेत. त्यांच्या पार्थिवावर उद्या रविवारी (ता. २६) अंत्यसंस्कार होणार आहेत.
सतीश शाह म्हणजे विनोद, सहज अभिनय आणि लोकांना आनंद देणाऱ्या कलाकृतींचे प्रतीक मानले जाते. त्यांनी आपल्या करिअरची सुरुवात १९८४ मध्ये ‘ये जो है जिंदगी’ या मालिकेपासून केली. त्यानंतर त्यांनी वर्षभरात ५० हून अधिक भूमिका साकारल्या. ‘साराभाई व्हर्सेस साराभाई’ या मालिकेतील इंद्रवदन साराभाई या भूमिकेमुळे त्यांना चांगलीच लोकप्रियता मिळाली. त्यांच्या खास विनोदी शैलीमुळे ही मालिका आजही प्रेक्षकांच्या मनात कोरली गेली आहे. १९८३ मध्ये प्रदर्शित झालेल्या ‘जाने भी दो यारों’ या चित्रपटातील त्यांच्या भूमिकेने त्यांना अभिजात विनोदी अभिनेत्यांच्या श्रेणीत स्थान मिळवून दिले. त्यानंतर ‘हम आपके है कौन,’ ‘दिलवाले दुल्हनिया ले जायेंगे,’ ‘मै हूँ ना’, ‘कल हो ना हो’, ‘ओम शांती ओम’सारख्या अनेक हिंदी चित्रपटांत त्यांनी लक्षवेधी भूमिका साकारल्या. टीव्ही मालिकांबरोबरच त्यांनी दोनशेहून अधिक चित्रपटांमध्ये काम केले आहे.
---
मराठी, गुजराती चित्रपटातही काम
केवळ हिंदीच नाही, तर गुजराती आणि मराठी चित्रपटांमध्येही त्यांनी काम केले. ‘वाजवा रे वाजवा’, ‘गोळाबेरीज’ या मराठी चित्रपटांत त्यांनी काम केले. सतीश यांच्या निधनानंतर चित्रपटसृष्टीतील सहकाऱ्यांनी दुःख व्यक्त केले. दिग्दर्शक डेव्हिड धवन, अभिनेत्री काजोल, तसेच निर्माते जेडी मजेठिया यांनी सहवेदना व्यक्त केल्या.