भात उत्पादक शेतकरी उद्धवस्त

कापलेले पीक पाण्यावर तरंगले
भिवंडी, ता. २६ (वार्ताहर) ः भाताचे कोठार म्हणून ओळखल्या जाणाऱ्या भिवंडी तालुक्यात ऐन दिवाळीच्या काळात सुरू असलेल्या अवकाळी पावसाने भात उत्पादक शेती पूर्णपणे उद्ध्वस्त केली आहे. दसरा ते दिवाळी या काळात शेतकरी शेतात पिकलेले भात कापून, सुकवून घरी नेत असतात; मात्र यंदा दसऱ्यानंतर आणि दिवाळीदरम्यान अवकाळी पावसाने अनेक वेळा हजेरी लावली. यामुळे शेतकऱ्यांनी शेतात कापून ठेवलेल्या भातात पाणी शिरले आहे.
शेतात कापून ठेवलेले भात आता पाण्यावर तरंगत असल्याचे विदारक दृश्य पाहायला मिळत आहे. दिवाळीपूर्वी झालेल्या पावसाने भातपिकावर रोग आला होता, तर आता हे पिकलेले भातपीक पाण्यात सडणार असल्याने शेतकरी हवालदिल झाला आहे. याबाबत शेतकरी शिवाजी राऊत यांनी माहिती दिली, की तालुक्यात अवकाळी पावसाचे पंचनामे झाले आहेत; परंतु शासनाकडून अद्याप कोणतीही मदत मिळाली नाही. त्यामुळे शेतकरीवर्गात तीव्र नाराजी पसरली आहे.