मुंब्रा बायपासवर रस्त्यावर दरड कोसळल्याने वाहतूक कोंडी!

मुंब्रा बायपासवर दरड कोसळल्याने कोंडी
कळवा, ता. २७ (बातमीदार) : मुंब्रा बायपास रस्त्यावर रविवारी (ता. २६) रात्री पावणेआठच्या सुमारास डोंगराची दरड कोसळल्याने वाहतुकीला अडथळा निर्माण झाला होता. पाऊस सुरू असताना रहमानिया हॉस्पिटलजवळ ही घटना घडली. दरडीचा मोठा दगड रस्त्यावर (शिळफाटाकडून येणाऱ्या वाहिनीवर) पडल्यामुळे सुमारे अर्धा तास वाहतूक कोंडी झाली होती. घटनेची माहिती मिळताच मुंब्रा वाहतूक पोलिस आणि आपत्ती व्यवस्थापन कक्षाचे कर्मचारी तातडीने घटनास्थळी दाखल झाले. त्यांनी दरड कोसळलेली वाहिनी तत्काळ बंद करून, दगड हटवण्याचे काम सुरू केले आणि दुसऱ्या मार्गिकेद्वारे वाहतूक सुरळीत केली. सुदैवाने या घटनेत कोणतीही जीवितहानी झाली नसल्याची माहिती मुंब्रा वाहतूक पोलिसांनी दिली आहे.