नाखवा, खलाशी माघारी

नाखवा, खलाशी माघारी
वादळसदृश वातावरणामुळे बोटी किनाऱ्यांवर
मुरुड, ता. २७ (बातमीदार)ः वादळसदृश वातावरणामुळे मच्छीमार बोटी मुरूडसह एकदरा, आगरदांडा, राजपुरीतील बंदरांवर आश्रयाला आहेत. त्यामुळे मासेमारीच्या नव्या हंगामात काहीतरी पदरी पडेल, या आशेने निघालेले नाखवा, खलाशांना माघारी परतण्याची वेळ आली आहे.
काही दिवसांपूर्वीच मच्छीमार बोटी समुद्रात मासेमारीकरिता गेल्या होत्या, परंतु पुन्हा हवामानात बदल होऊन विजेच्या कडकडाटासह जोरदार वारे वाहू लागल्याने जवळ समुद्रात मासेमारी करणाऱ्या बोटी तसेच काही मोठ्या बोटी एकदरा खाडीत, मुरूड किनाऱ्यावर येऊ लागल्या आहेत. यामुळे मासेमारी करणारे कोळीबांधवांवर पुन्हा उपजिविकेचे संकट निर्माण झाले आहे. या वादळसदृश वातावरणामुळे मच्छीमारी व्यवसायावर गंभीर परिणाम झाला असून, सध्या बाजारपेठेत मासळीचा पुरवठा कमी झाल्यामुळे भाव कडाडले आहेत.