कल्याण-डोंबिवलीकरांना सांस्कृतिक कार्यक्रमाची मेजवानी

कल्याण-डोंबिवलीत सांस्कृतिक कार्यक्रमाची मेजवानी
कल्याण, ता. २८ (वार्ताहर) ः ज्येष्ठ नागरिक दिन आणि महापालिका वर्धापनदिनाचे औचित्य साधून कल्याणच्या आचार्य अत्रे रंगमंदिरात दोन दिवसांच्या विशेष सांस्कृतिक कार्यक्रमांचे आयोजन करण्यात आले आहे. बुधवारी (ता. २९) सकाळी १० वाजल्यापासून महापालिकेचा समाजविकास विभागातर्फे ज्येष्ठ नागरिक महोत्सवाला सुरुवात होणार आहे. ज्येष्ठ नागरिकांचा सन्मान करणे, त्यांना सहभागाची संधी देऊन त्यांचा आनंद वाढवणे आणि त्यांच्यासाठी व्यासपीठ निर्माण करणे, हा या कार्यक्रमाचा उद्देश आहे. ज्येष्ठ नागरिकांनी सादर केलेले संगीत, नृत्य, नाट्य सादरीकरण, हास्य कविता, विडंबन गीते, आरोग्यविषयक मार्गदर्शन आणि ज्येष्ठ नागरिकांचा सन्मान सोहळा, असे कार्यक्रमाचे स्वरूप असेल.

गुरुवारी (ता. ३०) दुपारी तीन वाजल्यापासून महापालिकेच्या क्रीडा व सांस्कृतिक विभागातर्फे सांस्कृतिक कार्यक्रमाचे आयोजन करण्यात आले आहे. महापालिकेतील अधिकारी आणि कर्मचारी त्यांच्या सांस्कृतिक कला सादर करतील. कल्याण-डोंबिवलीकरांसाठी हा सांस्कृतिक सोहळा मनोरंजनाची आणि सन्मानाची मेजवानी ठरणार आहे.