प्रत्येक प्रभागात विरंगुळा केंद्र उभारणार

प्रत्येक प्रभागात विरंगुळा केंद्र उभारणार
ज्येष्ठ नागरिक महोत्सवात आयुक्तांचे प्रतिपादन

कल्याण, ता. ३० (वार्ताहर): ‘जगण्यासाठी एक उद्देश हवा, ज्यामुळे जगण्याचा आनंद द्विगुणित होईल,’ असे प्रतिपादन कल्याण-डोंबिवली महापालिका आयुक्त अभिनव गोयल यांनी केले. ज्येष्ठ नागरिकदिनाचे औचित्य साधून बुधवारी (ता. २९) आचार्य अत्रे रंगमंदिरात आयोजित केलेल्या ‘ज्येष्ठ नागरिक महोत्सवात ते बोलत होते. या वेळी महापालिकेच्या प्रत्येक प्रभागात सर्व सोयीसुविधांनी युक्त विरंगुळा केंद्र स्थापन केले जाईल, असे महापालिका आयुक्तांची आश्वासन दिले.

ज्येष्ठ नागरिक संघांच्या समस्यांचे निश्चितच निराकरण केले जाईल, तसेच शहराच्या स्वच्छतेसाठी ज्येष्ठ नागरिकांनी स्वच्छतेचे ब्रँड ॲम्बेसेडर म्हणून सहभागी व्हावे असे आवाहनदेखील त्यांनी केले. अनुभवसंपन्न आणि कार्यकुशल ज्येष्ठ नागरिकांची समाजाला आणि सरकारला गरज असल्याचे त्यांनी या वेळी म्हटले, तर ‘फेसकॉम’चे अध्यक्ष अण्णासाहेब टेकाळे यांनी महापालिकेची प्रशंसा करताना सांगितले की, ज्येष्ठ नागरिकांसाठी महोत्सव आयोजित करणारी आणि त्याचे समाज माध्यमांवर लाइव्ह प्रक्षेपण करणारी कल्याण-डोंबिवली ही महाराष्ट्रातील पहिली महापालिका ठरली आहे. ज्येष्ठ नागरिकांनी सादर केलेल्या हास्य कविता आणि विडंबन गीतांना उपस्थितांनी उत्स्फूर्त प्रतिसाद दिला.

ज्येष्ठ नागरिकांचा सन्मान
कार्यक्रमाच्या सुरुवातीला आयुक्त अभिनव गोयल यांच्या हस्ते ज्येष्ठ नागरिक संघाचे पदाधिकारी व ज्येष्ठ नागरिकांचा सत्कार करण्यात आला.

कौटुंबिक समस्यांवर मार्गदर्शन
मानसोपचारतज्ज्ञ डॉ. अमित धर्माधिकारी यांची मुलाखत डॉ. प्रशांत पाटील यांनी घेतली. यामध्ये डॉ. धर्माधिकारी यांनी ज्येष्ठ नागरिकांना भेडसावणाऱ्या शारीरिक व कौटुंबिक समस्यांवर मार्गदर्शन केले. महोत्सवाच्या माध्यमातून ज्येष्ठ नागरिकांना एक चांगले व्यासपीठ उपलब्ध करून दिल्याचा आनंद असल्याचे समाज विकास विभागाचे उपायुक्त संजय जाधव यांनी सांगितले. या वेळी अतिरिक्त शहर अभियंता प्रशांत भागवत, उपायुक्त रामदास कोकरे (घनकचरा) आणि किशोर शेळके (सचिव) यांसह अनेक मान्यवर उपस्थित होते.