वाहतूक पोलिसांना मद्यपी चालकाची धक्काबुक्की

मद्यपी चालकाची वाहतूक पोलिसांना धक्काबुक्की
सकाळ वृत्तसेवा
डोंबिवली, ता. ३१ : कल्याण पूर्वेतील चक्कीनाका येथे गुरुवारी (ता. ३०) रात्री महेश मल्हारी साळुंखे (वय ४०) या मद्यपी टेम्पोचालकाने वाहतूक पोलिसांना धक्काबुक्की करत गोंधळ घातल्याची घटना घडली.
वाहतूक पोलिस आनंदराव थोरात आणि त्यांचे सहकारी नाकाबंदीचे कर्तव्य बजावत असताना, हलगर्जीने टेम्पो चालवणाऱ्या महेशला त्यांनी अडवले. महेशने मद्य प्राशन केले असल्याचे निदर्शनास आल्यावर त्याला चौकीत आणले गेले. तेथे महेशने पोलिसांना विरोध करत, त्यांच्या शर्टाची कॉलर पकडून धक्काबुक्की केली. ‘मी स्वतःचा खून करून घेईल’ अशी बेताल बडबड करत त्याने चौकीतील सामानाची तोडफोड केली आणि खिडकीवर डोके आपटून स्वतःला जखमी करून घेतले. याप्रकरणी महेश साळुंखेविरोधात शासकीय कामात अडथळा आणि पोलिसांना अरेरावी केल्याबद्दल कोळसेवाडी पोलिस ठाण्यात गुन्हा नोंद करण्यात आला असून, पोलिस अधिक तपास करत आहेत.