मंगलमय वातावरणाची घरोघरी अनुभूती

मंगलमय वातावरणाची घरोघरी अनुभूती
नवी मुंबईत तुळशी विवाहाची लगबग, बाजारपेठा सजल्या
नेरुळ, ता.२ (बातमीदार)ः दिवाळी संपताच तुळशी विवाहाचे वेध लागतात. कार्तिक शुक्ल एकादशीपासून तुळशी विवाह प्रारंभ होतो. यानिमित्ताने तुळशी विवाहासाठी साफसफाई, रंगरंगोटी करण्यात येत असून घरोघरी मंगलमय वातावरणाची अनुभूती येते.
तुळशी विवाह निमित्त तुळशीची नवनवीन रोपे विकत घेतली जातात. घरोघरी चुन्याची रांगोळी काढली जाते. तुळशीची रोपे नवीन लाल माती घालून त्यांची रंगरंगोटी केली जाते. दारामध्ये तोरणे, पताके व फुलांची सजावट केली जाते. घरातील तुळशीला सजवण्यात येते. तुळशी विवाहासाठी उसाचा, केळीच्या पानांचा मंडप तयार केला जातो. पाटावर आसण टाकून तुळस, मूर्तीची प्रतिष्ठापना केली जाते. पहिल्यांदा गणपतीची पूजा केली जाते. काही ठिकाणी विड्याच्या पानांची वर म्हणून पूजा केली जाते. बाळ कृष्णाची मूर्ती किंवा तुळशीच्या मध्यांतर पाठ धरून मंगलाष्टके म्हणत विवाह लावण्यात येतो. विवाह संपन्न झाल्यानंतर फटाक्यांची आतषबाजी होते. त्यानंतर दिवाळी फराळ, लाह्या, बत्तासे, खजूर, उसाचे तुकडे वाटले जातात.
---------------------------------
पन्नास रुपयांना रोप
तुळशी विवाहासाठी तुळशीचे रोप महत्त्वाचे मानले जाते. यानिमित्ताने तुळशी वृंदावनात रंगोटी केली जाते. सणानिमित्त रोपाची किंमत दहा रुपयांनी वाढली असून चाळीस ते पन्नास रुपये झाली आहे. तुळशीचे रोप लावण्यासाठी लागणारी मातीची कुंडी शंभर ते चारशे रुपयांपर्यंत विकली जाते.
------------------------------------
साहित्याचे दर
तुळशीचे रोप - ४० ते ५० रुपये
उसाचे कांड - १० रुपये
लाल माती - १० रुपये
मोठे बाशिंग - २०० ते ३०० रुपये
छोटे बाशिंग - ८० रुपये डझन
छोटे हार - २० रुपये
पूजेची ओटी - दहा रुपये
नारळ - २० ते ३५ रुपये
मूर्ती ठेवण्यासाठी छोटे पाट - १००
कळस - २०० रुपये
पूजेचे पुस्तक - २० रुपये
------------------------------
गेल्या वर्षाच्या तुलनेत यंदा साहित्याच्या मागणीत वाढ झाली आहे. तुळशीच्या रोपांना अधिक मागणी आहे.
- मनोज रॉय, तुळशी विक्रेते