नवी मुंबईतील खेळाची मैदाने निष्क्रिय

नवी मुंबईतील खेळाची मैदाने निष्क्रिय
अनेक ठिकाणी डबक्याचे स्वरूप; क्रीडाप्रेमींचा हिरमोड
जुईनगर, ता. ३ (बातमीदार) ः सुनियोजित शहर म्हणून ओळखल्या जाणाऱ्या नवी मुंबईत प्रत्येक उपनगरात नागरिकांसाठी खेळाची मैदाने उभारण्यात आली आहेत, मात्र गेल्या सहा महिन्यांपासून या मैदानांची दुरवस्था पाहायला मिळत आहे. त्‍यामुळे खेळाडू आणि क्रीडाप्रेमींचा पुरता हिरमोड झाला आहे. वारंवार पडणाऱ्या पावसामुळे मैदानांमध्ये पाण्याचे डबके साचून ती चिखलमय बनली आहेत. परिणामी मुले आणि तरुण मंडळी खेळांपासून वंचित राहात आहेत.
नवी मुंबई महापालिकेने सिडकोकडून हस्तांतरित झालेल्या भूखंडांवर लाखो रुपये खर्च करून आकर्षक मैदाने विकसित केली होती. या मैदानांवर क्रिकेट, कबड्डी, फुटबॉल, योगा, धावण्याचे सराव, तसेच विविध सांस्कृतिक उपक्रमांसाठी नागरिकांचा वावर होता, परंतु सध्या या मैदानांवर मातीचे ढिगारे, कचरा आणि दारूच्या बाटल्या पडलेल्या दिसतात. काही ठिकाणी पावसाचे पाणी साचल्याने ते डबक्यांमध्ये परावर्तित झाले आहे. त्यामुळे खेळासाठी तयार केलेली मैदाने आज निरुपयोगी ठरत आहेत. शालेय सुट्टीच्या काळात मुले खेळण्यासाठी मैदानावर धाव घेतात, मात्र आता त्या मैदानात चिखल आणि कचऱ्यामुळे पाय ठेवायलाही जागा नाही. महापालिकेने मैदानांची नियमित स्वच्छता आणि पाणी निचऱ्याची व्यवस्था तातडीने करावी, अशी मागणी समाजसेवक अक्षय पाटील यांनी केली आहे.
............
विकसकांकडून डेब्रिजचे डम्पिंग
करावे गावालगतचे तांडेल मैदान, सीबीडी सेक्टर १ मधील सुनील गावस्कर मैदान, तसेच नेरूळ सेक्टर २४ मधील स्थानिक ग्रामस्थांनी श्रमदानातून विकसित केलेले मैदान, जुईनगरमधील गांवदेवी मैदान आदी सर्व ठिकाणी पावसाचे पाणी साचून खेळासाठी अडथळा निर्माण झाला आहे. विशेषतः नेरूळमध्ये रात्रीच्या वेळी काही बांधकाम व्यावसायिकांकडून मैदानावर डेब्रिज (विघटन साहित्य) टाकले जात असल्याचे समोर आले असून, स्थानिक खेळाडूंनी याविरोधात तीव्र नाराजी व्यक्त केली आहे.