पादचारी पुलावरून बाळाचे अपहरण

कल्याण, ता. ४ (बातमीदार) : रेल्वेस्थानक परिसरातील पादचारी पुलावरून एका बाळाचे अपहरण झाल्याची धक्कादायक घटना मंगळवारी (ता. ४) समोर आली. पुण्याहून कल्याणला आलेले एक दाम्पत्य आपल्या तीन मुलांसह या पुलावर सोमवारी (ता. ३) रात्री झोपले असताना ही घटना घडली. सीसीटीव्ही फुटेजच्या आधारे पोलिसांनी केवळ सहा तासांत अखेर संशयिताला ताब्यात घेत बाळाची सुरक्षित सुटका केली.

महात्मा फुले पोलिस ठाण्याच्या माहितीनुसार, अक्षय खरे या संशयित आरोपीने मंगळवारी रात्री उशिरा झोपलेल्या कुटुंबाजवळून बाळ उचलून नेले. जाग आल्यानंतर बाळ गायब असल्याचे लक्षात येताच चिंताग्रस्त झालेल्या पालकांनी तातडीने पोलिसांकडे धाव घेतली. पोलिसांनी तातडीने सीसीटीव्ही तपास सुरू करत शहरातील विविध परिसरात शोधमोहीम हाती घेतली. अखेर अक्षयची ओळख पटवून अटक करण्यात आली आणि अपहृत बाळाची सुरक्षित सुटका करण्यात पोलिसांना यश आले.