संघानी इस्टेट परिसरातील खड्ड्यांची पालिकेकडून दुरुस्ती

संघानी इस्टेट परिसरातील खड्ड्यांची पालिकेकडून दुरुस्ती
घाटकोपर, ता. ५ (बातमीदार) ः घाटकोपरमधील संघानी इस्टेट परिसरातील रस्त्यावर खड्डे पडल्‍याने अपघातांची भीती व्यक्‍त करण्यात येत होती. यासंदर्भात ‘सकाळ’च्या मंगळवारच्या (ता. ४) अंकात वृत्त प्रकाशित करण्यात आले होते. याची दखल घेत बुधवारपासून खड्ड्यांवर डांबर टाकून दुरुस्तीचे काम सुरू करण्यात आले आहे.
पालिका एन वाॅर्डचे सहाय्यक आयुक्त गजानन बेल्लाळे यांनी तत्काळ संबंधित अधिकाऱ्यांना रस्त्यांची दुरुस्ती करण्याचे निर्देश दिले. अलीकडेच पवईत खड्ड्यांमुळे तरुण दुचाकीस्वाराचा जीव गेल्याची घटना ताजी असतानाच संघानी इस्टेट परिसरातील खोल खड्ड्यांमुळे मोठा अपघात होण्याची शक्यता होती. परिसरातील नागरिकांनीही ठिकठिकाणी असलेल्या खड्ड्यांविषयी सातत्याने तक्रारी नोंदवल्या होत्या. दुरुस्तीसाठी मनसेचे शाखाध्यक्ष गणेश पवार, सचिव चेतन भाटकर यांनी आंदोलनाचा इशाराही दिला होता.