प्रतिबंधित प्लास्टिकविरोधात कारवाई थंडावली

प्रतिबंधित प्लॅस्टिकविरोधात कारवाई थंडावली
मुंबई, ता. १० : मुंबईत प्रतिबंधित प्लॅस्टिक कारवाई मोहीम गेल्या काही महिन्यांपासून थंडावली असून, बाजारात सर्रास प्लॅस्टिक पिशव्यांचा वापर होत आहे. कारवाई होत नसल्याने पदपथावरील फेरीवाले, मंड्या, दुकानदार तसेच बाजारात प्लॅस्टिकचा खुलेआम वापर होत आहे. काही दिवस कारवाई तीव्र केल्यानंतर पुन्ही ही मोहीम थंडावली असल्याचे चित्र आहे. प्लॅस्टिकमुळे पर्यावरणाला धोका असल्याची भीती व्यक्त होत आहे.

मुंबईत २०१८ मध्ये ५० मायक्रॉनपेक्षा कमी जाडीच्या प्लॅस्टिक पिशव्यांवर बंदी घालण्यात आली. नियम मोडणाऱ्यांवर कठोर कारवाई सुरू करण्यात आली; मात्र कोरोनामुळे ही कारवाई थंडावली होती. कोरोना आटोक्यात आल्यानंतर १ जुलै २०२२पासून पालिकेने कारवाईचा वेग वाढवला. त्यानंतर काही महिने पालिकेने बाजारात, मॉल, उपहारगृहे अशा ठिकाणी प्लास्टिकवर कारवाईचा बडगा उगारल्यानंतर मागील काही महिन्यांपासून कारवाई पुन्हा थंडावली आहे. सध्या बाजारात प्लॅस्टिकचा सर्रास वापर होताना दिसत असून, प्लॅस्टिकचे प्रमाण वाढत असतानाही कारवाईकडे मात्र दुर्लक्ष झाले आहे.