अपघातग्रस्ताला 23.27 लाखांची भरपाई मिळाली

अपघातग्रस्ताला २३.२७ लाखांची भरपाई
ठाणे न्यायालयाचा निकाल

ठाणे शहर, ता. ५ (बातमीदार) ः अपघातात जखमी झालेल्या पीडिताला ठाणे न्यायालयाने २३.२७ लाख रुपयांची भरपाई दिली. चार वर्षांपूर्वी पालघर जिल्ह्यातील मनोर गावात हा अपघात झाला होता. त्याबाबतच्या भरपाईची सुनावणी ठाणे न्यायालयात झाली. पालघर जिल्ह्यातील मनोर गावात (ता. ६ मे २०२१)ला रात्रीच्या सुमारास कंटेनरच्या धडकेत ४७ वर्षीय व्यक्तीला गंभीर दुखापत झाली होती. अनेक फ्रॅक्चर होऊन त्यांना अपंगत्व आले होते. त्याचा दावा ठाणे मोटार अपघात न्यायालयात सुनावणीसाठी दाखल झाला होता. त्यावर नुकताच अंतिम निकाल झाला. मोटर अपघात न्यायालयाचे न्यायाधीश आर. व्ही. मोहिते यांनी विमा कंपनी आणि पीडित वकिलांचा युक्तिवाद ऐकला. त्यानंतर पीडिताला २३ लाख २७ हजार रुपयांच्या भरपाईचा निकाल दिला.