विधी विद्यापीठाची उभारणी हा ऐतिहासिक टप्पा

विधी विद्यापीठाची उभारणी हा ऐतिहासिक टप्पा
सरन्यायाधीश भूषण गवई यांच्या हस्ते राष्ट्रीय विधी विद्यापीठ प्रकल्पाचे उद्‍घाटन

मुंबई, ता. ५ ः महाराष्ट्र राष्ट्रीय विधी विद्यापीठ प्रकल्प उभारणी हा ऐतिहासिक टप्पा आहे. राज्य शासनाने कायदा शिक्षणासाठी दाखविलेली बांधिलकी उल्लेखनीय आहे. महाराष्ट्रात न्यायपालिकेच्या पायाभूत सुविधांचा दर्जा देशात सर्वोत्तमांपैकी एक आहे, असे प्रतिपादन भारताचे मुख्य न्यायमूर्ती भूषण गवई यांनी बुधवारी (ता. ५) केले.

सरन्यायाधीश भूषण गवई यांच्या हस्ते महाराष्ट्र राष्ट्रीय विधी विद्यापीठ प्रकल्पाचे उद्‍घाटन करण्यात आले. याप्रसंगी मुख्य न्यायमूर्ती भूषण गवई यांचा सत्कार मुख्यमंत्री देवेंद्र फडणवीस यांच्या हस्ते करण्यात आला. या कार्यक्रमास मुंबई उच्च न्यायालयाचे मुख्य न्यायमूर्ती तथा महाराष्ट्र राष्ट्रीय विधी विद्यापीठाचे प्र-कुलगुरू न्या. चंद्रशेखर, न्या. भारती डांगरे, न्या. संदीप मर्ने, राज्याचे महाधिवक्ता वीरेंद्र सराफ, सार्वजनिक बांधकाममंत्री शिवेंद्रसिंह भोसले, अधिकारी, शिक्षकवर्ग आणि विद्यार्थी उपस्थित होते. हा प्रकल्प केवळ राष्ट्रीयच नव्हे, तर आंतरराष्ट्रीय दर्जाचा ठरेल, असा विश्वास या वेळी गवई यांनी व्यक्त केला. विद्यार्थ्यांना उद्देशून त्यांनी सांगितले, की कायद्याचे शिक्षण हे केवळ व्यवसाय नव्हे, तर समाज परिवर्तनाचे साधन आहे. वकील हे समाज अभियंते आहेत, जे सामाजिक आणि आर्थिक न्याय साकारतात. तर मुंबई उच्च न्यायालयाचे मुख्य न्यायमूर्ती चंद्रशेखर म्हणाले, की विधी विद्यापीठ हे केवळ शिक्षण देणारे केंद्र नसून, उत्तम नागरिक घडवण्याचे स्थान असल्याचे त्यांनी नमूद केले. कार्यक्रमाचे स्वागत व प्रास्ताविक कुलगुरू दिलीप उके यांनी केले, तर आभार कुलसचिव प्रकाश चौधरी यांनी मानले.

महाराष्ट्र हे तीन राष्ट्रीय विधी विद्यापीठ असलेले देशातील एकमेव राज्य आहे. मुंबई विद्यापीठाचा अत्याधुनिक प्रकल्प उभारणीसाठीच्या सर्व परवानग्या पूर्ण झाल्या आहेत. हा प्रकल्प केवळ महाराष्ट्राचाच नव्हे, तर आंतरराष्ट्रीय स्तरावरील विधी शिक्षणाचे केंद्र बनेल. नवी मुंबईत उभारण्यात येणाऱ्या ‘एज्यु-सिटी’मध्ये जगातील सर्वोच्च विद्यापीठे येणार आहेत.
- देवेंद्र फडणवीस, मुख्यमंत्री