खासगीकरणाला वाढता विरोध

खासगीकरणाला वाढता विरोध
‘सेव्हन हिल्‍स’प्रकरणी अंधेरी विकास समितीची निदर्शने
मुंबई, ता. ६ : सेव्हन हिल्स रुग्णालयाच्या खासगीकरणाला विरोध करीत गुरुवारी (ता. ६) अंधेरी विकास समितीने निदर्शने केली. हे रुग्‍णालय मुंबई महापालिकेने आपल्‍या ताब्‍यात घेऊन मुंबईकरांना चांगल्या आरोग्‍यसेवा द्याव्यात, अशी मागणी केली जात आहे.
जनहिताचा निर्णय होईपर्यंत निदर्शने सुरूच राहतील, असा इशारा आंदोलकांनी दिला. सकाळी ११ वाजता रुग्णालयावर शेकडो नागरिकांसह निषेध मोर्चा काढला. या निषेधाचे नेतृत्व कार्यकारी अध्यक्ष दिलीप माने, अध्यक्ष आणि माजी उपमहापौर राजेश शर्मा यांनी केले. हे रुग्‍णालय एका उद्योगपतीला विकण्याचा कट होतोय, असा आरोप या वेळी शर्मा यांनी केला. आमदार मुरजीकाका पटेल यांनी सांगितले, की ते समितीच्या मागण्यांशी सहमत आहेत. दोन ते तीन दिवसांत मुख्यमंत्री आणि दोन्ही उपमुख्यमंत्र्यांसोबत समितीची बैठक घेतली जाईल, असे आश्वासन त्यांनी दिले. माने म्हणाले, की मरोळ-अंधेरी परिसरात गरीब आणि मध्यमवर्गीय राहतात. २०१०मध्ये मुंबई महापालिकेने स्थापन केलेल्या सेव्हन हिल्स रुग्णालयाने हजारो गरीब रुग्णांना लाभ दिला आहे. हे रुग्णालय जे. जे., केईएम आणि सायन रुग्णालयांच्या धर्तीवर चालवले पाहिजे. त्‍यामुळे गरीब आणि मध्यमवर्गीय विद्यार्थ्यांना परवडणाऱ्या दरात वैद्यकीय आणि नर्सिंग अभ्यासक्रम घेण्याची संधी मिळेल, असे त्‍यांनी सांगितले.