मोखाड्यात गॅस्ट्रोची फैलाव, चार गावात ७८ रुग्ण

मोखाड्यात गॅस्ट्रोचा फैलाव
चार गावांत ७८ रुग्ण बाधित; १३ रुग्णांवर उपचार सुरू
मोखाडा, ता. ७ (बातमीदार) : मोखाडा तालुक्यात दूषित पाण्यामुळे गॅस्ट्रोच्या साथीचा फैलाव झाला असून, चार गावांमध्ये आतापर्यंत ७८ रुग्ण बाधित झाले आहेत. यातील ६५ रुग्ण ठीक झाले आहेत, तर १३ रुग्णांवर उपचार सुरू आहेत.
बोरशेती येथे ३० ऑक्टोबर रोजी गॅस्ट्रोची साथ सुरू झाली. आठ दिवसांत या साथीचा फैलाव मारुतीचीवाडी, सावरपाडा, आणि हुंड्याचीवाडी या तीन गावांमध्येदेखील झाला आहे. मोखाड्यातील सायदे-जोगलवाडी ग्रामपंचायतीमधील बोरशेती येथे ३० ऑक्टोबरला दूषित पाणी प्यायल्याने, येथील आदिवासींना ढाळ-वांतीची (गॅस्ट्रो) लागण झाली होती. आतापर्यंत बोरशेतीमधील गॅस्ट्रोबाधित सुमारे ६३ रुग्णांवर उपचाराअंती येथील रुग्णांच्या संपर्कात याच ग्रामपंचायत हद्दीतील मारुतीचीवाडी येथील तीन आणि सावरपाड्यातील एक रुग्ण बाधित झाला होता. या सर्वांना उपचाराअंती घरी सोडण्यात आले. याचदरम्‍यान याच ग्रामपंचायत हद्दीतील हुंड्याचीवाडी येथील १३ रुग्णांना गॅस्ट्रोची लागण झाली. यामधील सात रुग्णांना खोडाळा प्राथमिक आरोग्य केंद्रात, तर सहा रुग्णांना नाशिकच्या जिल्हा शासकीय रुग्णालयात ऊपचारासाठी दाखल केले असल्याची माहिती मोखाड्यातील वैद्यकीय अधिकाऱ्यांनी दिली.
दरम्यान, साथ आटोक्यात आणण्यासाठी आरोग्य विभागाने बोरशेती आणि हुंड्याचीवाडी येथील दूषित पाण्याची विहीर सील केली आहे. तसेच, वैद्यकीय अधिकाऱ्यांसह कर्मचाऱ्यांचे पथक तैनात करून घरोघरी सर्वेक्षण आणि उपचार सुरू केले आहेत.
-------
ग्रामपंचायत आणि पाणीपुरवठा विभागाचे दुर्लक्ष
एप्रिल महिन्यात आरोग्य विभागाने सर्वेक्षण करून पाण्याचे स्रोत तपासले होते. त्या वेळी येथील विहिरींचे पाणी पिण्यास जोखमीचे तसेच विहिरींची दुरुस्ती करण्याचा अहवाल ग्रामपंचायतीला दिला होता; मात्र त्याकडे ग्रामपंचायत आणि पाणीपुरवठा विभागाने, दुर्लक्ष केले आहे. विहिरींची दुरुस्ती व पाणी शुद्धीकरण केले नाही. त्यामुळे दूषित पाणी प्यायल्याने येथील नागरिकांना गॅस्ट्रोची लागण झाली.
-------
हुंड्याचीवाडी येथील गॅस्ट्रोची साथ आटोक्यात आणण्यासाठी एक वैद्यकीय अधिकाऱ्यांसह, आरोग्य सहाय्यक, चार आरोग्य सेवक, एक आरोग्य सेविका, आशा कार्यकर्ती, पर्यवेक्षक आणि अंगणवाडी सेविका अशी टीम गावातच तैनात केली आहे. साथ आटोक्यात आणण्यासाठी दूषित पाण्याची विहीर बंद केली आहे.
भाऊसाहेब चत्तर, तालुका वैद्यकीय अधिकारी, मोखाडा