पाण्यासाठी वैतागून वरिष्ठ नागरिकाचा आत्महत्तेचा प्रयत्न

पाण्यासाठी वरिष्ठ नागरिकाचा आत्महत्येचा प्रयत्न

कल्याण, ता. ७ ( वार्ताहर) : डोंबिवली एमआयडीसी निवासी भागामध्ये काही दिवसांपासून पाणीप्रश्न गंभीर झाला आहे. काही इमारतींना तर आठवडाभर पाण्याचा एकही थेंब आला नसल्याने नागरिक त्रस्त झाले आहेत. याबाबत ते एमआयडीसी कार्यालयात दररोज जाऊन जाब विचारत आहेत, तर पाणी नसल्याने गुरुवारी ज्येष्ठ नागरिक काशिनाथ सोनावणे हे (वय ७६) राहणार जय गुरुदेव सोसायटी इमारीतीच्या गच्चीवरून आत्महत्या करण्याचा प्रयत्नात होते. या वेळी त्याच सोसायटीत राहणारे अनिल शिंदे यांनी त्यांची समजूत काढून घरी सोडले. तसेच वकील मुकुंद वैद्य यांनी आणि रहिवाशांनी उद्योगमंत्री उदय सामंत, तसेच एमआयडीसी वरिष्ठ अधिकाऱ्यांना ईमेल करून निवासी भागातील पाण्याचा प्रश्न सोडविण्याची मागणी केली आहे.
---