लोकल पकडताना पडल्याने प्रवाशाचा मृत्यू

धावती लोकल पकडताना
पडल्याने प्रवाशाचा मृत्यू

नवी मुंबई, ता. ७ (वार्ताहर) : धावती लोकल पकडण्याच्या प्रयत्नात एका व्यक्तीचा मृत्यू झाला. शुक्रवारी सायंकाळी वाशी रेल्वेस्थानकात ही घटना घडली. जयेश शशिकांत मळेकर (वय ४१) असे मृत व्यक्तीचे नाव आहे.
जयेश मळेकर हा मुंबई सेंट्रलचा रहिवासी होता. तो कामानिमित्त नवी मुंबईत आला होता. सायंकाळी घरी परतण्यासाठी वाशी रेल्वेस्थानकात आला. या वेळी वाशी रेल्वेस्थानकाच्या फलाट क्रमांक ४ वरून मुंबईच्या दिशेने जाणारी धावती लोकल पकडण्याचा त्याने प्रयत्न केला, मात्र या वेळी त्याचा तोल गेल्याने तो लोकलसह काही अंतर फरपटत जाऊन फलाटावर पडला. या अपघातात जयेश गंभीर जखमी झाला. वाशी रेल्वे पोलिसांनी त्याला तातडीने महापालिकेच्या रुग्णालयात दाखल केले, मात्र उपचारादरम्यान त्याचा मृत्यू झाल्याची माहिती वाशी रेल्वे पोलिस ठाण्याचे वरिष्ठ पोलिस निरीक्षक किरण उंदरे यांनी दिली.
--