तातडीने उपाययोजना न झाल्यास भटके कुत्रे पालिकेत सोडू

...तर भटके कुत्रे पालिकेत
ॲड. रोहिदास मुंडे यांचा इशारा
सकाळ वृत्तसेवा
ठाणे, ता. ८ ः दिवा परिसरात भटक्या कुत्र्यांची संख्या नियंत्रणाबाहेर गेलेली आहे. वारंवार तक्रारी करूनही पालिका प्रशासनाने अद्याप कोणतीही ठोस कारवाई केलेली नाही. दोन दिवसापूर्वी निष्पाप लहान मुलीला चावा घेतला, त्यामुळे या घटनेनंतर परिसरात भीतीचे वातावरण निर्माण झाले असून यावर तातडीने उपाययोजना न झाल्यास भटके कुत्रे पालिकेत सोडू, असा इशारा शिवसेना ठाकरे गटाचे कल्याण ग्रामीण विधानसभा प्रमुख ॲड. रोहिदास मुंडे यांनी दिला.
दिवा येथील काळूबाई बिल्डिंगजवळ नुकतेच दोन वर्षांच्या वेदा विकास काजारे या मुलीला एका भटक्या कुत्र्याने मागून हल्ला करून गंभीर जखमी केले. या घटनेने परिसरात भीतीचे वातावरण निर्माण झाले असून, पालिकेकडून वारंवार तक्रारी करूनही कोणतीही ठोस कारवाई झाली नसल्याने नागरिकांमध्ये तीव्र नाराजी आहे. ॲड. रोहिदास मुंडे यांनीही यावर तीव्र नाराजी व्यक्त केली आहे. पालिकेने तातडीने भटके कुत्रे पकडण्याची आणि त्यांच्यावर योग्य प्रक्रिया राबवण्याची कार्यवाही न केल्यास, नागरिकांच्या सुरक्षेसाठी परिसरातील सर्व भटके कुत्रे गोळा करून थेट महापालिका कार्यालयात सोडण्यात येतील, असा इशारा ॲड. मुंडे यांनी दिला आहे. या गंभीर प्रश्नावर महापालिका प्रशासन काय भूमिका घेते, हे पाहणे महत्त्वाचे ठरणार आहे.