ऐरोली नाट्यगृहाच्या बांधकामाची अभिनेते प्रशांत दामले यांच्याकडून पाहणी

ऐरोली नाट्यगृहाच्या बांधकामाची
प्रशांत दामले यांच्याकडून पाहणी
वाशी, ता. ८ (बातमीदार) : नवी मुंबई महापालिकेच्या वतीने ऐरोली सेक्टर ५ येथे सुरू असलेल्या नवीन नाट्यगृहाच्या बांधकामाची अखिल भारतीय मराठी नाट्य परिषदेचे अध्यक्ष आणि अभिनेते प्रशांत दामले यांनी नुकतीच पाहणी केली. कामाची पाहणी केल्यानंतर प्रशांत दामले यांनी समाधान व्यक्त केले.
दामले यांनी ऐरोली नाट्यगृह हे नवी मुंबईतील विष्णूदास भावे नाट्यगृहाप्रमाणेच उत्तम सुविधांनी सुसज्ज असावे, अशी अपेक्षा व्यक्त केली. या वेळी त्यांनी नाट्यगृहातील ध्वनी संयोजन (ॲकॉस्टिक व्यवस्था), प्रकाशयोजना, कलावंत रंगभूषा कक्ष, बैठक व्यवस्था आणि प्रसाधनगृह व्यवस्था यांसारख्या आवश्यक सुविधांची गुणवत्ता चांगली राखण्याबाबत महत्त्वाच्या सूचना केल्या. तसेच ‘सुरू असलेले काम चांगले आहे,’ असा अभिप्रायही दिला
ऐरोली येथील हे नवीन नाट्यगृह ८६० आसन क्षमतेचे असून, ते नवी मुंबई शहराच्या सांस्कृतिक वैभवात भर घालणार आहे. नुकतेच नमुंमपा आयुक्त डॉ. कैलास शिंदे यांनीही कामाची पाहणी करून नवीन वर्षाच्या प्रारंभापर्यंत काम पूर्ण करण्याचे निर्देश दिले आहेत. आगामी काळात ऐरोली येथील नाट्यगृह म्हणजे नवी मुंबईसह शेजाच्या शहरांतील नाट्यरसिकांसाठीही पर्वणी ठरणार आहे.