पिकअपच्या धडकेत दाम्पत्य जखमी

वाहन अपघातात दाम्पत्य जखमी
कासा, ता. ८ (बातमीदार) ः मुंबई-अहमदाबाद राष्ट्रीय महामार्गावरील विव्हळवेढे महालक्ष्मी परिसरात शनिवारी (ता. ८) दुपारी साडेतीनच्या सुमारास झालेल्या वाहन अपघातात एक दाम्पत्य जखमी झाले.
गुजरातकडून मुंबईच्या दिशेने दुचाकीने जात असलेले विष्णू रावते (वय ४६) आणि त्यांची पत्नी गुलाब रावते (४४, रा. गंजाड) यांना एका अज्ञात महिंद्रा पिकअप वाहनाने जोरदार धडक दिली. या अपघातात विष्णू रावते यांच्या पायास गंभीर दुखापत झाली, तर त्यांच्या पत्नीला किरकोळ दुखापत झाली. त्यांना तातडीने रुग्णवाहिकेद्वारे उपजिल्हा रुग्णालय, कासा येथे उपचारासाठी दाखल करण्यात आले.
अपघाताची माहिती मिळताच महामार्ग पोलिस उपनिरीक्षक मकानदार व त्यांच्या सहकाऱ्यांनी घटनास्थळी धाव घेऊन अपघातग्रस्त वाहन बाजूला केले आणि वाहतूक सुरळीत केली. या घटनेचा पुढील तपास चारोटी पोलिस ठाण्याकडून सुरू आहे.