वाचनाच्या गोडीसाठी वाचनालयाची निर्मिती

उल्हासनगर, ता. ८ (बातमीदार) : शिवसेनेच्या माजी नगरसेविका जयश्री सुर्वे यांनी वयोवृद्ध आणि तरुणाईत पुस्तक-पेपर वाचनाची गोडी निर्माण व्हावी, यासाठी आपल्या जनसंपर्क कार्यालयात वाचनालय सुरू केले आहे. या वाचनालयाचे उद्‍घाटन ठाणे महानगर परिवहन सेवेत सहाय्यक सुरक्षा अधिकारी दत्तू मल्हारी बरकले यांच्या हस्ते करण्यात आले. दत्तात्रय व्यायामशाळेसमोर असलेल्या त्यांच्या कार्यालयात नागरिकांना निवांतपणे बसून वाचनाचा आनंद घेता यावा; तसेच समाजात वाचन संस्कृती बहरावी, या उद्देशाने हे वाचनालय उभारण्यात आले. नागरिक, वयोवृद्ध, महिला आणि तरुण वर्ग यांच्यासाठी विविध विषयांवरील पुस्तके, वर्तमानपत्रे आणि नियतकालिकांची सोय येथे केली आहे. याप्रसंगी मोहीत सुनील सुर्वे, रक्षा सुर्वे, ज्येष्ठ कार्यकर्ते पाटकर दादा, मंजू गुजर, मिताली वायंगणकर, सरस्वती शेटकर, अश्विनी कदम, ज्योती सुर्वे, सुजाता सुर्वे आणि सोनम गुळीक उपस्थित होते. वाचन संस्कृती जपण्यासाठी सुर्वे यांच्या या उपक्रमाचे नागरिकांनी स्वागत केले आहे.