लहान भावाची मध्यस्थी मोठ्या भावाला पडली महागात

भांडणात करणे मध्यस्थी मोठ्या भावाला पडली महागात
सकाळ वृत्तसेवा
ठाणे, ता. ९ : रस्त्यावरील भांडणात मध्यस्थी करणे दोन भावंडांना चांगलेच महागात पडले आहे. एका तरुणाने मध्यस्थी करणाऱ्या तरुणाच्या डोक्यात बिअरची बाटली फोडल्याचे समोर आले आहे. याप्रकरणी आनंद बोराटे यांनी चितळसर पोलिस ठाण्यात तक्रार दाखल केली असून, यानुसार नितीन शिंदे याच्याविरोधात गुन्हा दाखल करण्यात आला आहे.
पोलिसांच्या माहितीनुसार, आनंद बोराटे हे त्यांचे आई-वडील व लहान भाऊ राजेश यांच्यासह मानपाडा येथे राहतात. याच परिसरात राहणारे नितीन शिंदे यांचे बुधवारी (ता. ६) रात्री एका मुलासोबत भांडण सुरू होते. ते भांडण राजेश आणि त्या परिसरातील इतर चार मुलांनी सोडवले. याची माहिती आनंद बोराटेला त्याच्या भावाने दिली होती. त्यानंतर आनंद बोराटे गुरुवारी (ता. ७) त्याचा मित्र अनिल चोरगे व नितीन शिंदे यास घराशेजारी भेटले. अनिल याने आनंदला दारू पिण्याकरिता जाऊ, असा आग्रह केल्याने ते तिघे त्याच परिसरातील एका बारमध्ये गेले. अंदाजे एक वाजण्याच्या सुमारास आनंदने नितीनला भांडणाविषयी विचारले. त्याच रागातून तुझा भाऊ राजेश हा मध्ये का पडला, अशी विचारणा करत थेट बिअरची बॉटर आनंदच्या डोक्यात मारली. यामध्ये त्याच्या डोक्याला दुखापत झाली आहे. याप्रकरणी चितळसर पोलिस ठाण्यात नितीन याच्याविरोधात गुन्हा दाखल करण्यात आला असून पुढील तपास वरीष्ठ पोलिस निरीक्षक सुनील वरुडे यांच्या मार्गदर्शनाखाली सुरू आहे.