मुंबई शहर जिल्हास्तरीय युवा महोत्सव उत्साहात संपन्न

मुंबई शहर जिल्हास्तरीय युवा महोत्सव उत्साहात संपन्न
शिवडी, ता. ९ (बातमीदार) : मुंबई शहर जिल्हास्तरीय युवा महोत्सव सन २०२५-२६ हा मारवाडी कमर्शिअल हायस्कूल अँड ज्युनियर कॉलेज, चर्नी रोड येथे शुक्रवारी (ता. ७) मोठ्या उत्साहात संपन्न झाला. महाराष्ट्र शासन, क्रीडा व युवक सेवा संचालनालय, पुणे अंतर्गत जिल्हा क्रीडा परिषद व जिल्हा क्रीडा अधिकारी कार्यालय, मुंबई शहर यांच्या संयुक्त विद्यमाने हा कार्यक्रम आयोजित करण्यात आला होता.
मारवाडी कमर्शिअल हायस्कूल अँड ज्युनियर कॉलेजचे विश्वस्त देवीचंदजी आणि प्राचार्या कुसुम पाठक हे प्रमुख पाहुणे म्हणून उपस्थित होते. क्रीडा अधिकारी अनिल घुगे (मुंबई शहर) यांनी प्रास्ताविक केले, तर जिल्हा क्रीडा अधिकारी मार्क धरमाई यांनी स्पर्धकांना मार्गदर्शन करून शुभेच्छा दिल्या.
महोत्सवामध्ये सांस्कृतिक, कौशल्य विकास व नवोपक्रम विभागांतील विविध स्पर्धा घेण्यात आल्या. लोककला, विज्ञान, चित्रकला, कथा व कविता लेखन विभागांसाठी मान्यवर परीक्षक उपस्थित होते. श्रद्धा गंभीर (सोमय्या कॉलेज) यांनी कार्यक्रमाचे सूत्रसंचालन केले. पारंपरिक दीपप्रज्वलनाने सुरू झालेल्या या कार्यक्रमाचा समारोप राष्ट्रगीताने झाला.