चोरीच्या गुन्ह्यांतील पळपुट्या आरोपी महिलेस अटक

पोलिस ठाण्यातून पळालेल्या महिलेस अटक
अंधेरी, ता. ९ (बातमीदार) : एमआयडीसी पोलिसांनी चोरीच्या गुन्ह्यात अटकेनंतर पोलिस ठाण्यातून पळून गेलेल्या दिव्या वसंत काळे ऊर्फ मुस्कान पवार (वय ३२) या महिलेला संभाजीनगर येथून अटक केली आहे. स्थानिकांनी चोरी करताना तिला पकडून पोलिसांच्या स्वाधीन केले होते व तिच्यावर गुन्हा दाखल करून अटकेची कारवाई करण्यात आली होती. मूळची संभाजीनगरच्या लासून, गंगापूरची रहिवासी असलेली ही महिला गुरुवारी (ता. ६) रात्री उशिरा आपल्या दोन्ही मुलांसोबत पोलीस ठाण्यातून पळून गेली होती. पोलिसांनी तत्काळ तिचा शोध सुरू केला. ती आपल्या गावी पळून गेल्याची माहिती मिळताच वरिष्ठ पोलिस निरीक्षक रविंद्र वाणी यांच्या पथकाने शुक्रवारी (ता. ७) संभाजीनगर येथे जाऊन तिला शिताफीने अटक केली. तिला मुंबईत आणल्यानंतर वांद्रे येथील स्थानिक न्यायालयात हजर केले जाणार आहे.