अत्यंत अवघड व कठिण तैलबैला किल्ला साहसी गिर्यारोहकांनी केला सर...

अवघड तैलबैला किल्ला गिर्यारोहकांकडून सर
कल्याण, ता. १० (वार्ताहर) - अत्यंत अवघड व कठीण श्रेणीत गणला जाणारा तैलबैला किल्ला कल्याण येथील गिर्यारोहक भूषण पवार यांनी यशस्वीपणे सर केला आहे. या किल्ल्याची समुद्रसपाटीपासून उंची तब्बल तीन हजार ३३२ फुट इतकी आहे. तर, २५० फूट प्रस्तर भिंतीवर प्रस्तरारोहण व गिर्यारोहक भूषण पवार यांनी केले. हा किल्ला पुणे जिल्ह्यात येत असला तरी सुधागड तालुक्याच्या सीमेवर आणि किल्ल्याच्या अगदी समोर आहे.
कल्याण येथील रहिवासी गिर्यारोहक व प्रस्तरारोहक भूषण पवार आणि हिम ऑर डील संघाचे चेतन शिंदे यांनी या मोहिमेचे आयोजन व नेतृत्व केले होते. कल्याण गिर्यारोहक संघाचे ते अध्यक्ष आहेत. भूषण पवार यांनी गिर्यारोहणाचे तंत्रशुध्द प्रशिक्षण घेऊन आपली आवड जोपासत आजवर अनेक सुळके व गड-किल्ले सर केले आहेत. या डोंगराच्या माथ्यावर जाण्यासाठी गरजेचे सामान व गिर्यारोहणाच्या तंत्राची माहिती असणे आवश्यक आहे. श्वेताली गुल्हाने, सिमरन अगरवाल यांनी या मोहिमेत सहभाग घेतला होता.