ग्रामीण खेळाडूंनी राष्ट्रीय स्तरावर नेतृत्व करावे

वाणगाव, ता. १० (बातमीदार) : डहाणू तालुक्यातील ग्रामीण भागातील विद्यार्थी, खेळाडू अनेक अडचणींवर मात करून क्रीडा क्षेत्रात आपले स्थान निर्माण करत आहेत. या खेळाडूंनी आता राष्ट्रीय स्तरावर नेतृत्व करावे, असे आवाहन चिंचणी-तारापूर शिक्षण संस्थेचे चेअरमन रजनीकांत श्रॉफ यांनी केले.

चिंचणी येथील के. डी. हायस्कूल व एम. के. ज्युनियर कॉलेज येथे जिल्हा क्रीडा अधिकारी कार्यालय व पालघर क्रीडा परिषद यांच्या संयुक्त विद्यमाने १४, १७ व १९ या वय गटांसाठी डहाणू तालुकास्तरीय क्रिकेट स्पर्धेचे आयोजन करण्यात आले होते. या कार्यक्रमाच्या अध्यक्षस्थानावरून श्रॉफ बोलत होते. स्पर्धेचे समन्वयक प्रा. सुधीर भांडवलकर यांनी चिंचणीतील क्रिकेटचा उज्ज्वल वारसा पुढे नेण्याचा निर्धार व्यक्त केला. या स्पर्धेत २४ संघ आणि सुमारे ३८४ खेळाडू सहभागी झाले असल्याची माहिती तालुका क्रीडा केंद्रप्रमुख डॉ. नीलेश गायकवाड यांनी दिली.

मुलांमध्ये १४ वर्षांखालील गटात डहाणूतील एच. एम. पी. हायस्कूल, १७ वर्षांखालील गट गटात बाडापोखरणमधील सरस्वती विद्यामंदिर, तर १९ वर्षांखालील गटामध्ये वडकुण येथील एस. आर. के. ज्युनियर कॉलेज आणि मुलींमध्ये १७ वर्षांखालील गटात डहाणूतील सेंट मेरी हायस्कूल, १९ वर्षांखालील गटात बाबुभाई पोंदा ज्युनियर कॉलेजची पालघर जिल्हास्तरीय स्पर्धेसाठी निवड झाली.