पालिकेच्या शौचालयावर उभारले अनधिकृत शेड

पालिकेच्या शौचालयावर उभारले अनधिकृत शेड
धारावीतील रहिवाशांचा संताप
धारावी, ता. ११ (बातमीदार) : धारावीतील ढोरवाडा येथील नव्याने बांधण्यात आलेले एकमजली शौचालय सूरू केले नसल्याने रहिवाशांकडून संताप व्यक्त करण्यात येत आहे. जवळपास तीन वर्षांपूर्वी हे शौचालय तोडले होते. त्यानंतर त्याचे नूतनीकरण करण्यात आले आहे, मात्र सध्या ते बंद असल्याने परिसरातील ज्येष्ठ नागरिकांबरोबर महिलावर्गाची गैरसोय होत आहे. शौचालय वापरात नसल्याने त्याच्यावर कुणाचेही नियंत्रण नाही. याचा गैरफायदा काही जण घेत आहेत. यातूनच शौचालयाच्या छतावर कुणीतरी शेड उभारली आहे.
यासंदर्भात विचारणा केली असता शौचालयावर कुणी व का शेड उभारली आहे, याची माहिती घेऊन पुढील कार्यवाही करू, अशी प्रतिक्रिया ग उत्तर विभागाचे सहाय्यक आयुक्‍त विनायक विसपुते यांनी दिली. ढोरवाडा येथील चंदेरी मैदानाजवळील दुरवस्था झालेले बैठे शौचालय पालिकेतर्फे तोडून त्याजागी नवीन एकमजली शौचालय उभारण्यात आले आहे. जवळपास तीन वर्षांपूर्वी हे शौचालय तोडण्यात आले होते, मात्र अद्यापपर्यंत नव्याने बांधण्यात आलेले शौचालय खुले केले नसल्याने स्थानिकांना त्रास सहन करावा लागत आहे. त्‍यामुळे संताप व्यक्त केला जात आहे.
शेकडो कुटुंबे या शौचालयाचा गेल्या अनेक वर्षांपासून वापर करत आहेत, मात्र दोन वर्षांपासून शौचालय वापरता येत नसल्याने स्थानिकांना दुसऱ्या शौचालयाचा वापर करावा लागत आहे. नैसर्गिक विधी उरकण्यासाठी लहान मुले, वृद्ध, ज्येष्ठ नागरिक, रुग्ण, गरोदर स्त्रिया यांना दूवरील शौचालयात जावे लागत असल्याने त्यांना त्रास सहन करावा लागत आहे.

चौकशी करण्याची मागणी
नूतनीकरण झालेले शौचालय लवकरात लवकर सुरू करावे, अशी मागणी येथील रहिवासी करत आहेत. हे शेड नेमके कुणी व का उभारले आहे, याची चौकशी पालिकेने करावी, अशी मागणी होत आहे.