डॉक्टरांचे आमरण उपोषण मागे; सर्व मागण्या मान्य

डॉक्टरांचे आमरण उपोषण मागे; सर्व मागण्या मान्य
घाटकोपर, ता. ११ (बातमीदार) : जैवरासायनिक कचरा संकलन आणि विल्हेवाटीबाबत एस. एम. एस. इंव्होक्लीन प्रा. लि. कंपनीकडून होत असलेल्या गैरव्यवहाराविरोधात नॅशनल इंटिग्रेटेड डॉक्टर्स असोसिएशनने मंत्रालयासमोर पुकारलेले आमरण उपोषण आज मागे घेतले. कंपनीने डॉक्टरांच्या सर्व प्रमुख मागण्या मान्य केल्याचे लेखी आश्वासन दिल्यानंतर हा निर्णय घेण्यात आला.
शासनाने निश्चित केलेल्या दरापेक्षा अधिक शुल्क आकारणी, सेवेत ढिसाळपणा आणि अनियमितता तसेच कंपनीच्या कर्मचाऱ्यांकडून डॉक्टरांशी गैरवर्तन यासंदर्भात असोसिएशनने उपमुख्यमंत्री एकनाथ शिंदे यांना निवेदन दिले होते. उपोषण जाहीर होताच कंपनीच्या संचालक मंडळाने असोसिएशनच्या प्रतिनिधींशी चर्चा करून सर्व मागण्या मान्य करण्याची तयारी दर्शवली, अशी माहिती असोसिएशनचे कार्याध्यक्ष डॉ. योगेश भालेराव यांनी दिली.
असोसिएशनचे अध्यक्ष डॉ. अमोल आंबेकर यांनी सांगितले की, अनेक वर्षांपासून डॉक्टरांवर जादा शुल्काचा बोजा पडत होता. वारंवार चर्चा करूनही कार्यवाही होत नसल्याने आम्हाला आंदोलनाचा मार्ग स्वीकारावा लागला. उपोषणाच्या इशाऱ्यामुळेच कंपनीने तातडीने मागण्या मान्य केल्या.