मुंबई क्रिकेट संघाने पटकावले विजेतेपद

मुंबई क्रिकेट संघाने पटकावले विजेतेपद
कल्याण, ता. ११ (वार्ताहर) : विरार येथील नारिंगी ग्रामस्थ क्रीडा मैदानावर ७ ते ९ नोव्हेंबर रोजी पीडी वेस्ट झोन चॅम्पियनशिप झाली. या स्पर्धेत मुंबई संघाने रविंद्र संते यांच्या नेतृत्वाखाली खेळून विजेतेपद पटकावले. यासोबतच संपूर्ण स्पर्धेत अजिंक्य राहून आपले वर्चस्व प्रस्थापित केले. या स्पर्धेत वेस्ट झोन क्रिकेट क्षेत्रात येणाऱ्या मुंबई, महाराष्ट्र, गुजरात, बडोदा आणि सौराष्ट्र अशा पाच संघानी भाग घेतला.
अंतिम सामना हा मुंबई विरुद्ध गुजरात यांच्यात झाला. नाणेफेक जिंकून गुजरात संघाने प्रथम फलंदाजी करत २० षटकात १२८ धावा केल्या, तर मुंबई संघाने फक्त २ गडी गमावत अवघ्या १५ षटकात सहजपणे १२९ धावांचा पाठलाग पूर्ण केला. अंतिम सामन्यात सलामीला आलेल्या प्रसाद चौहान याने नाबाद ८४ धावा करत सामनावीराचा पुरस्कार पटकावला. स्पर्धेतील उत्कृष्ट फलंदाज आकाश सानप (२२६ धावा), उत्कृष्ट गोलंदाज गणेश पिसाळ (७ विकेट्स) तर प्लेयर ऑफ द टूर्नामेंटचा पुरस्कार आकाश पाटील (११५ धावा व ७ विकेट्स) याने पटकावला.