विधवेची १४ लाखांची फसवणूक

लग्नाच्या भूलथापा देऊन विधवेची १४ लाखांची फसवणूक

सकाळ वृत्तसेवा
ठाणे, ता. ११ : एका विधवेला लग्नाच्या भूलथापा देऊन लग्नानंतर घराची गरज आहे. त्यासाठी त्या विधवेकडून १४ लाख रुपये घतले, मात्र यात आपली फसवणूक झाल्याचे समोर येताच याप्रकरणी नवी मुंबईतील समीर उर्फ हार्दिक सीताराम नाईक याच्याविरोधात पोलिस ठाण्यात तक्रार दाखल करण्यात आली आहे.
फसवणूक झालेल्या महिलेच्या पतीचे निधन झाले आहे. तिला १२ वर्षांची मुलगी आहे. पतीच्या निधनानंतर दुसरे लग्न करण्यासाठी तिने एका एका मॅरेज ॲपवर नाव नोंदवले होते. त्यातून नवी मुंबईमधील समीर उर्फ हार्दिक सीताराम नाईक याच्याशी तिची ओळख झाली. त्याने पहिल्या पत्नीपासून घटस्फोट घेतला आहे, असे सांगितले. तसेच तो वागळे इस्टेट परिसरातील रबर कंपनी नोकरी करत असून, घणसोली येथे भाड्याने राहतो. त्याचे आई-वडील, भाऊ हे सिंधुदुर्ग येथे राहात आहेत, अशी माहिती दिली. लग्नानंतर राहण्यासाठी घणसोली येथे नवीन घर विकत घेतल्याचे त्याने सांगितले. तसेच नवीन घर ताब्यात मिळाल्यावर, आपण लग्न करू असे बोलत होता. नवीन घराचा ताबा घेण्यासाठी पैसे कमी पडल्याचे सांगून बिल्डरला देण्यासाठी पैशाची आवश्यकता असल्याचे बोलून महिलेकडून उसने पैसे मागितले. एकूण १२ लाख ६ हजार ७०० रुपये घेतले. तसेच महिलेच्या मामेभावाकडून दोन लाख रुपये घेतले. त्यानंतर त्याने मोबाईल फोन बंद केला. तसेच दिलेल्या पत्त्यावर तो राहात नसल्याचे समोर आले. पुढील तपास कळवा पोलिस करत आहेत.